ހުކުރު ދުވަހު އިދިކޮޅުން ކުރި މުޒާހަރާގެ ތެރެއިން ސައިކަލުގައި ދިޔަ މީހަކު ހައްޔަރުކުރި އިރު އޭނާގެ ގާތުގައި ކުޑަކުއްޖަކު ހުރިކަމެއް ނޭނގޭކަމަށް ފުލުހުންގެ ޚިދުމަތުން ބުނެފި އެވެ. 

އިދިކޮޅުގެ މުޒާހަރާގެ ތެރެއިން ސައިކަލެއްގައި ދިޔަ މީހަކު ހައްޔަރުކުރީ ކުޑަކުއްޖަކާއި އެކުގައި ހުއްޓާކަމަށް އިދިކޮޅު ކޯލިޝަނުން ކުރަމުންދާ ތުހުމަތުތަކަށް ފުލުހުން ވަނީ ދެކޮޅު ހަދާފައެވެ. އަދި އިދިކޮޅުގެ ކުޑަ ކުއްޖަކާއި އެކު ހުރި މީހަކު ހައްޔަރުކޮށްފައި ނުވާނެކަމަށް ބުނެ ފުލުހުން ވަނީ ބަޔާނެއް ވެސް ނެރެފައެވެ. 

އިދިކޮޅު ޕީޕީއެމް ޕީއެންސީން ކޯލިޝަނުން މިއަދު ބޮޑުތަކުރުފާނު މަގުގައި މުޒާހަރާކުރަމުން ދަނިކޮށް ކުޑަކުއްޖަކު ގޮވައިގެން ސައިކަލްގައި ދިޔަ މީހަކު ސައިކަލް މަޑުކޮށް ފުލުހުންގެ ފޮޓޯއެއް ނެގި ކަމަށް ބުނެ ހައްޔަރުކުރުމުން ފުލުހުންނަށް ބޮޑެތި ފާޑުކިޔުންތަކެއް އަމާޒުވެފައި ވަނިކޮށް ފުލުހުން ނެރުނު އެ ބަޔާނުގައި ބުނެފައިވަނީ މުޒާހަރާގެ ތެރެއިން މީހަކު ހައްޔަރު ކުރީ ސަފަކަށް އެތުރިގެން ތިބި ފުލުހުންގެ ކުރިމައްޗަށް އަރައި އެއްޗެއް އެއްލި މައްސަލައެއްގައި ކަމަށެވެ.

Advertisement

އަދި އެވަގުތު އޭނާ ކައިރީގައި ކުޑަކުއްޖަކު ފެންނަން ނެތް ކަމަށްވެސް ފުލުހުން ބުނެފައިވެ އެވެ.

ފުލުހުން މިފަދައިން ބުނި ނަމަވެސް އިދިކޮޅު ކޯލިޝަނުން ނެރުނު ބަޔާނުގައި ބުނެފައިވަނީ އިދިކޮޅު ކޯލިޝަނުން އިހުތިޖާޖު ކުރަމުން ދަނިކޮށް އެސަރަހައްދުން ކުޑަކުއްޖަކާއެކު ސައިކަލެއްގައި ދަތުރު ކުރަމުން ދިޔަ މީހަކު އެއްވެސް ބެލުމެއް ނެތި، ވީނުވީއެއް ނޭނގި ކުޑަ ކުއްޖެއްގެ ކުރިމަތިން އަނިޔާވެރިކަމާއެކު މީހަކު ހައްޔަރުކޮށްފައިވާ ކަމަށެވެ. 

އެމީހާ ހައްޔަރު ކުރީ ސުލްހަވެރިކަމާއެކު ކުރިއަށް ގެންދެވުނު އިޙުތިޖާޖު ހިނގަމުން ދިޔަ ސަރަހައްދުން ސައިކަލެއްގައި ކުޑަ ކުއްޖަކާ އެކު ދަތުރު ކުރި ފިރިހެނަކު އެސަރަހައްދަށް މަޑުކޮށް އޭނާގެ ފޯނުން ފޮޓޯއެއް ނެގުމަށްފަހު ސަރަޙައްދުން ދިޔުމަށް މަސައްކަތް ކުރަނިކޮށްކަމަށް އިދިކޮޅުން ވަނީ ބުނެފަ އެވެ. 

އިދިކޮޅުން ވަނީ އެ މައްސަލަ ވަރަށް ސީރިއަށް މައްސަލައެއްގެ ގޮތުގައި ތަހުގީގުކޮށްދިނުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއާއި ނޭޝަނަލް އިންޓެގްރިޓީ ކޮމިޝަނަށް ގޮވާލާފަ އެވެ.