އިދިކޮޅު ކޯލިޝަނުން ހުކުރު ދުވަހު ކުރި މުޒާހަރާ ކުރިއަށް ދިޔަ ސަރަހައްދުން ކުޑަ ކުއްޖަކާއި އެއްކޮށް ހުއްޓާ އަނިޔާވެރިކަމާއެކު ހައްޔަރުކުރި މީހާ ކޯޓު އަމުރާއެކު ދޫކޮށްލައިފި އެވެ.

ފުލުހުން ބުނި ގޮތުގައި ފުލުހުން އެމީހާ ހައްޔަރުކޮށްފައި ވަނީ ސަފަކަށް އެތުރިގެން ތިބި ފުލުހުންގެ ކުރިމައްޗަށް އަރައި އެއްޗެއް އެއްލި މައްސަލައެއްގަ އެވެ.

އެމީހާ ހައްޔަރު ކުރިއިރު ގާތުގައި ކުޑަކުއްޖަކު ހުރިކަމެއް ނޭނގޭކަމަށް ފުލުހުން ވަނީ ބުނެފަ އެވެ. 

Advertisement

އެހެން ނަމަވެސް އިދިކޮޅު ކޯލިޝަނުން އެކަމާއި ގުޅޭގޮތުން ނެރުނު ބަޔާނެއްގައި ބުނެފައިވަނީ އެމީހާ ހައްޔަރުކުރީ ކުޑަކުއްޖަކު ގޮވައިގެން ސައިކަލުގައި ގޮސް ސައިކަލް މަޑުކޮށް ފުލުހުންގެ ފޮޓޯއެއް ނެގި ކަމަށް ބުނެއެވެ. 

އެ މައްސަލައިގައި ހައްޔަރުކުރި މީހާ ބަންދުކުރުމަށް ކޯޓަށް ހާޒިރުކުރުމުން ކޯޓުން ވަނީ އެމީހާ ދޫކޮށްލުމަށް ފުލުހުންގެ މައްޗަށް އަމުރުކޮށްފަ އެވެ. 

ކުޑަކުއްޖަކު ގާތުގައި ހުއްޓާ އަނިޔާވެރިގޮތަކަށް ފުލުހުން މީހަކު ހައްޔަރުކުރި މައްސަލަ އިދިކޮޅު ކޯލިޝަނުން ވަނީ ހަރުކަށި އިބާރާތުން ކުށްވެރިކޮށްފަ އެވެ. 

އިދިކޮޅުން ބުނީ ރާއްޖޭގެ މަގުތަކަކީ އާންމުންނަށް އަމާން ތަނެއް ކަމުގައި ހެދުމުގެ ޒިންމާ ހަވާލުވެފައިވާ ފުލުހުންގެ ފަރާތުން، ހިނގާ ބިގާވެ ދަތުރުކޮށް އުޅޭ މީހުންނަށް ވަކި ސަބަބު ނާންގައި ފުލުހުން އަނިޔާކުރަން ފެށުމަކީ މަގުތަކުގެ އަމާންކަމާމެދު ރައްޔިތުން ސުވާލު އުފައްދާނެ ކަމެއް ކަމަށެވެ. 

އެހެންކަމުން، އެމީހާ ހައްޔަރުކުރުމުގައި ފުލުހުން އަމަލުކޮށްފައިވާ ގޮތް ސީރިއެސް މައްސަލައެއްގެ ގޮތުގައި ބަލައި ފިޔަވަޅު އެލުމަށް އިދިކޮޅުން ވަނީ ހިއުމަން ރައިޓްސް ކޮމިޝަން އޮފް ދަ މޯލްޑިވްސްއާއި ނޭޝަނަލް އިންޓެގްރިޓީ ކޮމިޝަނަށް ގޮވާލައިފަ އެވެ.