ކޮންމެ ކަމެއް އޮޅުވާލަން މަސައްކަތް ނުކުރުމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު (މޮސްޓާ) ފުލުހުންނަށް ވިދާޅުވެއްޖެއެވެ.

މޮސްޓާ މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

"ކޮންމެ ކަމެއް އޮޅުވާލަން ޕޮލިހުން މަސައްކަތް ނުކުރޭ، ބޮޑީ ކެމެރާ ހުންނާނެ، މަގުމަތީގައިވެސް ކެމެރާ ހުންނާނެ، ދިވެހިރައްޔިތުންނަކީ ގަޅި ގަމާރުންނަށް ހަދަން ނޫޅެބަލަ ކޮންމެ ފަހަރަކު" ނަޝީދު ވިދާޅުވެފައިވެއެވެ.

Advertisement

ނަޝީދު މިހެން ވިދާޅުވެފައިވަނީ މިދިޔަ ހުކުރުދުވަހު އިދިކޮޅުން ކުރި މުޒާހަރާގެ ތެރެއިން ކުޑަކުއްޖަކާއި އެކު ހުރި މީހަކު އެކުއްޖާގެ ކުރިމަތީގައި ފުލުހުން ހައްޔަރު ކޮށްފައި ވަނިކޮށެވެ.

މިމައްސަލައާއި ގުޅިގެން ފުލުހުން ބުނެފައިވަނީ އެދުވަހު މުޒާހަރާތެރެއިން ހައްޔަރުކުރި މީހާއަކީ ކުރީ ސަފުގައި އެތުރިގެން ތިބި ފުލުހުންނާއި ދިމާއަށް އެއްޗެއް އެއްލައިގެން ހައްޔަރުކުރި މީހެއް ކަމަށެވެ. އަދި އޭނާ ހައްޔަރުކުރި އިރު އޭނާގެ ގާތުގައި ކުޑަކުއްޖަކު ނެތް ކަމަށެވެ. އަދި އެމީހާގެ ފަޔަށް އަނިޔާވެފައި ވަނީ ހައްޔަރުކުރުމުގެ ތެރޭގައި އޭނާ ދެކޮޅުހެދުމުން ކަމަށެވެ.

ފުލުހުން މިހެން ބުނެފައިވީނަމަވެސް އޭނާ ހައްޔަރު ކުރި ވަގުތުގެ ވީޑިއޯތައް ފެނި ގިނަ ބަޔެއްގެ ފާޑުކިޔުންތައްވަނީ އަމާޒުވެފައެވެ.