އައްޑިހައިގެ އަަހަރުތަކުގެ ތެރޭގައި ރާއްޖޭގެ ގިނަ ބައެއްގެ މަޤްބޫލްކަން ހޯދި މ. ހާވިލާ އަހުމަދު ޝާހިދު ހަލީމް މިއަދު ހެނދުނު ނިޔާވެއްޖެއެވެ.
އުމުރުން 72 އަހަރުފުޅުގައި ޝާހިދު ނިޔާވީ ވަރަށް ގިނަ ދުވަހު ބަލިވެ، އައިޖީއެމްއެޗްގައި ފަރުވާ ހޯއްދަވަމުން އަންނަނިކޮށެވެ. ޝާހިދުއަކީ ރާއްޖޭގައި މަޝްހޫރު ވެގެންދިޔަ ބަހަބަރު ގެ އެންމެ ވަރުގަދަ އެއް ތަރިއެވެ.
ދިވެހިންގެ ތެރޭގައި ޝާހިދު އެންމެ ފުރަތަމަ މަޝްހޫރުވީ ކުޅަދާނަ ތަމްސީލު ކުޅުންތެރިއެއްގެ ގޮތުގައެވެ. އެގޮތުން ރާއްޖޭގެ ސްޓޭޖް ތަމްސީލުގެ ރަން ދުވަސްވަރު ކަމަށްވާ 1970ގެ ތެރޭގައި އޭނާ ވަނީ އެތައް ތަމްސީލެއް ކުޅުއްވައިފައެވެ.
ޝާހިދު ވަނީ، ދިވެހި އަދަބިއްޔާތަށް ވެސް ވަރަށް ގިނަ ހިދުމަތްތައް ކޮށްދީފަ އެވެ. އޭނާގެ ޅެންތައް ރާއްޖޭގެ އެކި ނޫސްތަކުގައި ކުރިން ޝާއިއުކުރިއެވެ. އަދި، މުނިފޫހިފުލުވުމުގެ ރޮނގުން އޭނާ އަށް ސަރުކާރުން ވަނީ އާންމު ޚިދުމަތުގެ އިނާމް ވެސް ދީފައެވެ.
ޝާހިދުގެ އަށް ކުދިން ދުނިޔޭގައި އެބަތިއްބެވެ. އޭގެ ތެރޭގައި ރާއްޖޭގެ ގިނަ ބަޔަކު ބަލައިގެންފައިވާ ޓީވީ ޕްރެޒެންޓަރު މޫސާ ރިޟްވާން ވެސް ހިމެނެއެވެ.
ޝާހިދުގެ ބައްޕަ މޫސާ ހަލީމް ހިންގެވި މަދަރުސަތުލް އަހްރާރުގައި މުދައްރިސްކަން އޭނާ ކުރައްވައިފައިވެއެވެ. މީގެ އިތުރުން އޭނާ އެންމެ ގިނަ ދުވަހު ވަޒީފާ އަދާކުރެއްވީ އެޓޯލްސް މިނިސްޓްރީގައެވެ. އެންމެ ފަހުން މަސައްކަތްކުރެއްވީ މާފަންނު އަވަށު އޮފީހުގައެވެ.
Advertisement
This content is created and paid for by advertisers and does not involve Voice Journalists
