އިދިކޮޅު ޕީޕީއެމް/ޕީއެންސީ ލީޑަރޝިޕް ގެ ބައެއް ބޭފުޅުން މިއަދު ފުލުސް އޮފީހަށް ހާޒިރުވާން އަންގާފައިވާ ކަމަށް އެ ކޯލިޝަނުން ބުނެފިއެވެ. 

މިއަދު ފުލުސް އޮފީހަށް ހާޒިރުވާން އަންގާފައިވަނީ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) އާއި, މަޑުއްވަރީ ދާއިރާގެ މެންބަރު އާދަމް ޝަރީފް އުމަރު އާއި، ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުހައްމަދު ސައީދު އާއި ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް އާއި ޕީއެންސީގެ ނާއިބު ރައީސް މުހައްމަދު ޝުޖާއު އެވެ. 

ޓޮމް އަށް ފުލުސް އޮފީހަށް ހާޒިރުވާން އަންގާފައިވަނީ މިއަދު 10:00 ގައެވެ. އަދި އާދަމް ޝަރީފް އުމަރުއަށް 11:00 ޖަހާއިރު ފުލުހުންގެ އޮފީހަށް ހާޒިރުވާން އަންގާފައިވާއިރު، ސައީދަށް އަންގާފައިވަނީ 12:00 އަށް ހާޒިރު ވުމަށެވެ. މީގެ އިތުރުން ޝިޔާމަށް 13:00 އަށް އަދި ޝުޖާއު އަށް 16:00 އަށް ފުލުސް އޮފިހަށް ހާޒިރުވާން ވަނީ އަންގައިފަ އެވެ. 

Advertisement

އެ ބޭފުޅުން ޕޮލިސް އޮފީހަށް ހާޒިރު ކުރަނީ މިމަހު 20 ވަނަ ދުވަހު، ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ އިސްތިއުނާފު މައްސަލަ ދިގުލައިގެންދާތީ އިދިކޮޅުގެ އޮތް ކަންބޮޑުވުންތަކާއެކު ހައިކޯޓަށް ވަޑައިގަތުމަށްފަހު، އެތަނުން ނިކުމެވަޑައިގެން ޖުމްހޫރީ މައިދާނަށް އެއްވެ ތިއްބާ ހައްޔަރު ކުރި މައްސަލަ އާއި ގުޅިގެން ކަމަށް ޕީޕީއެމުން މައުލޫމާތު ދެއެވެ. 

އެދުވަހު އިދިކޮޅު ލީޑަރުން ޖުމްހޫރީ މައިދާނުގައި ތިއްބަވަނިކޮށް ފުލުހުން ވަނީ އެ ސަރަހައްދަށް އައިސް ލީޑަރުން ފަހަތަށް ޖައްސާފައެވެ. އަދި އެވަގުތު އެތަނުގައި ތިއްބެވި އިދިކޮޅު ލީޑަރުން ފުލުހުން ވަނީ ހައްޔަރުކޮށްފަ އެވެ. 

ފުލުހުން އިދިކޮޅު ލީޑަރުން ހައްޔަރުކުރަމުން ދިޔައިރު، އެ މަންޒަރުތައް ކަވަރުކުރަމުން ދިޔަ ނޫސްވެރިންނަށް ހުރަސްއަޅާ، ނޫސްވެރިން ފަހަތައް ޖައްސާ، ކޮއްޕާ ހުރަސްއަޅާފައިވާކަން ފާހަގަކޮށްލެވެއެވެ.