ރައީސް ކަމުގައި ހުންނަވައިގެން ނުހޯއްދެވުނު ސަޕޯޓެއް ޖަލުގައި ހުންނަވައިގެން ނުހޯއްދެވޭނެ ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

"ރައީސް ޔާމިން ވެރިކަމުގައި ހުންނަވައިގެން ފުރިހަމަ އާރާއި ބާރުގަ ހުންނެވިއިރު ލިބުވަޑައިނުގަތް ސަޕޯޓެއް މިހާރު އޮތްކަމަށް ޕީޕީއެމް ލީޑަރުން ދައްކަވަން އުޅުއްވިޔަސް އެއީ ހަޤީޤަތެއް ނޫން، ރައީސް ކަމުގައި ނުހޯއްދެވުނު ސަޕޯޓެއް ޖަލުގައި ހުންނަވައިގެން ހޯއްދެވޭނެ ގޮތެއް ނޯންނާނެ" ޝަރީފް ވިދާޅުވެފައިވެއެވެ.

Advertisement

މީގެ އިތުރުން ޝަރީފް ވިދާޅުވީ ރައީސް ޔާމިންގެ ވެރިކަން ނިމުނުތާ ހަމަސް ފަހުން ބޭއްވުނު މަޖިލިސް އިންތިޚާބުން ޕީޕީއެމްގެ ސައިޒު އެނގިގެން ދިޔަކަމަށެވެ. އަދި ވެރިކަން ކުރި ޕާޓީއަކަށް މަޖިލިސް އިންތިޚާބެއްގައި ލިބުނު އެންމެ ދެރަ ނަތީޖާ ލިބުނު ޕާޓީއަކީ ޕީޕީއެމް ކަމަށްވެސް ޝަރީފް ވިދާޅުވިއެވެ.

"އެންމެ ފަހުން ބޭއްވި މަޖިލިސް އިންތިޚާބުން ޕާޓީތަކަށް އޮތް ތާއީދާއި ސައިޒު އެއޮތީ ރީތިކޮށް ފެންނަން، އެއީ ވޯޓު ފޮށިން ދައްކާ ނަތީޖާ، ހަމަ ތިބެފަ ދައްކާ ވާހަކައެއް ނޫން" ޝަރީފް ވިދާޅުވެފައިވެއެވެ.

ޝަރީފް މިގޮތަށް ވާހަކަ ދައްކަވާފައިވާއިރު ޕީޕީއެމް ޕީއެންސީ ކޯލިޝަނުން މަސައްކަތް ކުރަމުންދަނީ އެކޯލިޝަނުން ރިޔާސީ އިންތިޚާބަށް ނެރޭ ބޭފުޅަކީ ރައީސް ޔާމިން ކަމަށް ހެދުމަށެވެ.

ޕީޕީއެމްގެ ދަފްތަރުގައި މިވަގުތު 38704 މީހުން ތިބިއިރު ޕީއެންސީގެ ދަފްތަރުގައި 3159 މީހުން އެބަތިއްބެވެ. އެއީ މުޅި ޖުމްލަ 41،863 މީހުންނެވެ. އިދިކޮޅު ކޯލިޝަންގެ ޢަދަދުގައި މިހާވަރަށް މީހުން ތިބިއިރު މި ހުރިހާ އެންމެންގެވެސް އުންމީދު ގުޅިފައިވަނީ ރައީސް ޔާމީނަށް ކަމަށް ކޯލިޝަނުން ބުނެއެވެ.