ކިތަންމެ ވަރަކަށް ޕޮލިހަށް ހާޒިރުކުރިޔަސް ރައީސް ޞާލިޙް ދިވެހިންގެ މާލިއްޔާ ހުސްކޮށް ޤައުމު ދަރުވާނުލާކަމަކަށް ނުވާނެކަމަށް ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވެއެޖެއެވެ.
ޝިޔާމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
ޝިޔާމް ކުރެއްވެވި ޓްވީޓުގައި ވަނީ މިއަދު އޭނާ ޕޮލިހަށް ހާޒިރުވުމަށް ޕޮލިހުން ފޮނުވާފައިވާ ނޯޓިސްވެސް ހިއްސާކުރައްވާފައެވެ.
"ކިތަންމެ ވަރަކަށް ޕޮލިހަށް ހާޒިރު ކުރިޔަސް ރައީސް ޞާލިޙް ދިވެހިންގެ މަސްކަނޑު ނުވިއްކާ ކަމަކަށް ނުވާނެ، ދިވެހިންގެ މާލިއްޔާ ހުސްކޮށް ޤައުމު ދަރުވާނުލާކަމަކަށް ނުވާނެ، ސިޔާސީ ނުފޫޒު ކޯޓުތަކަށް ފޯރުވައިގެން ރައީސް ޔާމީނަށް އަނިޔާ ނުދޭކަމަކަށް ނުވާނެ" ޝިޔާމްގެ ޓްވީޓުގައި ވިދާޅުވެފައިވެއެވެ.
ޖުމްހޫރީ މައިދާނަށް އެއްވި މައްސަލާގައި ޕީޕީއެމް ޕީއެންސީގެ އިސް ބައެއް ފަރާތްތަކަށް މިއަދު ޕޮލިހަށް ހާޒިރުވުމަށް ނޯޓިސް ވަނީ ފޮނުވައިފައެވެ.
އޭގެ ތެރޭގައި މަހިބަދޫ ދާއިރާގެ މެމްބަރު އަޙްމަދު ޠާރިޤް، މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު، ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުޙައްމަދު ސަޢީދު، ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް އަދި ޕީއެންސީގެ ނާއިބު ރައީސް މުހައްމަދު ޝުޖާޢު ހިމެނެއެވެ.
Advertisement
This content is created and paid for by advertisers and does not involve Voice Journalists
