ނައިބް ރައީސެއްގެ ހައިސިއްޔަތުން މިހާރުގެ ނައިބު ރައީސް ފައިސަލް ނަސީމް ދައްކުވައިދެއްވީ ނަމޫނާ ރީތި މިސާލެއް ކަމަށާއި، އެ މަނިކުފާނުގެ ނަންފުޅު ދިވެހި ތާރީޚުގެ ރަންކުލައި ލިޔެވިގެން ދާނެކަމުގައި ކުރީގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މަޖިލިސް މެންބަރު އާދަމް ޝަރީފް އުމަރު ވިދާޅުވެއްޖެއެވެ. 

ރައީސް އިބްރާހިމް މުހައްމަދު ސޯލިހްގެ ރަނިންމޭޓް އެއްގެ ގޮތުގައި މިއަހަރުގެ ރިޔާސީ އިންތިހާބުގައި ނިކުންނަވާ ބޭފުޅަކީ އައްޑޫ މެމްބަރު އަސްލަމް ކަމުގައި އެމްޑީޕީން މިއަދު އިއުލާންކޮށްފައި ވާއިރު، މި ނިންމުމާމެދު ގިނަ ބަޔަކަށް ވަނީ ހައިރާންކަމެއް ގެނުވާފައެވެ. 

ރަނިންމޭޓް ކަމުން ފައިސަލް ބާކީވެވަޑައިގެން މި ދަނޑިވަޅުގައި އާދަމް ޝަރީފް އުމަރު ކުރެއްވި ޓްވީޓުގައި އިތުރަށް ބުނެފައިވަނީ، ރައީސުލްޖުމްހޫރިއްޔާއަށް ވަފާތެރިކަމާއެކު ރިޔާސީ ދައުރެއް ފުރިހަމަ ކުރެއްވުމަކީ ފައިސަލް ނަސީމްގެ ނަންފުޅު ދިވެހި ތާރީޚުގެ ރަންކުލައި ލިޔެވިގެން ދާނެކަމުގައެވެ. 

ރައީސްގެ ރަނިންމޭޓްއެއް ގޮތުގައި އަސްލަމް އައްޔަން ކުރުމާއި ހަމައަށް ގިނަ ބަޔަކު ބުނަމުން އައީ އެ މަގާމަށް އެންމެ އެކަށޭ އެންމެ ގާބިލު އިހްލާސްތެރި ބޭފުޅަކީ ފައިސަލް ނަސީމް ކަމުގައެވެ. 

އަދި އެ މަގާމަށް އައްޔަން ކުރައްވާނެކަމަށް ގިނަ ބަޔަކަށް ހީވެފައިވެސް އޮތީ ފައިސަލް ނަސީމްއެވެ. 

މިއާއެކު ރިޔާސީ ރޭހުގައި ފައިސަލް ނަސީމް ބާކީވެ ވަޑައިގަތުމާއެކު އެ މަނިކުފާނުގެ މިސްރާބު ދެން އަނބުރައިލައްވާނީ ކޮން ދިމާލަކަށް ތޯ އެއީ މިވަގުތު އުފެދިފައިވާ ބޮޑު ސުވާލެކެވެ.