މީސެލްސް ނުވަތަ ހިމަބިއްސަށް ފައްސިވެފައިވާ އިތުރު މީހަކު ރާއްޖޭން ފެނިފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
މި މީހާ ހިމަބިއްސަށް ޕޮސިޓިވް ވެފައިވާކަން އެނގިފައިވަނީ އިއްޔެކަމުގައި އެޗްޕީއޭއިން ހާމަކޮށްފައިވާއިރު، އެމީހާއަކީ ރާއްޖޭން ބޭރުން ބަލި ޖެހިގެން ރިޕޯޓް ކޮށްފައިވާ ފަރާތެއް ކަމަށް ވެސް އެޗްޕީއޭއިން ވަނީ ހާމަކޮށްފައެވެ.
މި ވޭދަނަ ފެނުމާއި ގުޅިގެން ކުރީ ފަހަރުތަކެކޭ އެއްފަދައިން ބަލި ފެތުރުމުގެ ފުރުޞަތު ދެނެގަތުމާއި އޭނާއާ ގާތުން އެއްތާވި ފަރާތްތައް ދެނެގަތުމުގެ މަސައްކަތް ކުރަމުން އަންނަ ކަމަށާއި މި ވޭދަނަ މޮނިޓަރކޮށް ހިމަބިހި ވެކްސިން ފުރިހަމަނުވާ ފަރާތްތަކަށް އަދި ބަލިޖެހުނު ފަރާތް ދިރިއުޅޭ ސަރަހައްދުގައި ރިންގް ވެކްސިން ދިނުމުގެ ކަންތައްތައް ކުރިއަށް ގެންދެވޭނެ ކަމަށް އެޗްޕީއޭއިން ވިދާޅުވެއެވެ.
މިހާތަނަށް ބެލި ބެލުމުން މި ވޭދަނަ އާއި މިދިޔަ ޖުލައި މަހުގެ ފަހުކޮޅު ފެނިފައިވާ ހިމަބިހި ވޭދަނަ އާއި ގުޅުމެއް ހުރިކަމަށް ނުބެލެވޭ ކަމަށް އެޗްޕީއޭއިން ވަނީ ބުނެފައެވެ.
ރާއްޖެ އިން ހިމަބިހި ނައްތާލާފައިވާކަމަށް މީގެ ކުރިން ދުނިޔޭގެ ސިއްހަތާއި ބެހޭ ޖަމިއްޔާ (ޑަބްލިވްއެޗްއޯ) އިން އިއުލާނުކޮށް 2017 ވަނަ އަހަރު އެކަމުގެ އެވޯޑުވެސް ވަނީ ރާއްޖެއަށް އަރުވައިފައެވެ.
Advertisement
This content is created and paid for by advertisers and does not involve Voice Journalists
