ސެޕްޓެމްބަރު 9 ވަނަ ދުވަހު ބޭއްވުމަށް ތައްޔާރުވަމުން އަންނަ ރިޔާސީ އިންތިހާބުގައި ޕީއެންސީގެ ފަރާތުން ވާދަކުރައްވާ ކެނޑިޑޭޓް، ޑރ މުހައްމަދު މުއިޒުއަށް ތާއީދު ކުރެއްވުމަށް ކުރިގެ ރައީސް ޔާމީން ނިންމެވި ނިންމެވުމަށް، ރައީސް އަބްދުﷲ ޔާމީން އަބްދުލް ގައްޔޫމް ގެ އެޑްވައިޒަރ ކުރީގެ ރައީސް ޑރ މުހައްމަދު ވަހީދު ހަސަން މަނިކު ޝުކުރު އަދާކުރައްވައިފިއެވެ.  

ޑރ މުހައްމަދު ވަހީދު ހަސަންމަނިކު މިއަދު ކުރެއްވި ޓުވީޓެއްގައި ރައީސް ޔާމީންގެ ނިންމެވުމަށް ޝުކުރު އަދާކުރައްވައި، ޕީޕީއެމް/ ޕީއެންސީގެ ރިޔާސީ ކެންޑިޑޭޓް މުހައްމަދު މުއިއްޒުއަސް ވަނީ މަރުހަބާވެސް ވިދާޅުވެފައެވެ. 

ރައީސް ޔާމީނަށް އިންތިހާބުގައި ވާދަނުކުރެވޭ ހާލަތެއްގައި ޕީޕީއެމްގެ ފަރާތުން އިންތިހާބުގައި ވާދަކުރައްވާނެ ކަމަށް ބެލެވުނު ބޭފުޅެކެވެ. އެ މަނިކުފަނުންގެ ކުށުގެ ރިކޯޑުވެސް ސާފުކުރެއްވުމަށް ހުށަހެޅި އިރު، ރައީސް ޔާމީނަށް ވާދަ ނުކުރެވޭ ހާލަތެއްގައި އިންތިހާބުގައި ވާދަކުރެއްވުމަށް ތައްޔާރަށް ހުންނެވިކަންވެސް ވަހީދުވަނީ ހާމަކުރައްވައިފައެވެ. 

Advertisement

ޕީޕީއެމް/ޕީއެންސީ ކޯލިޝަން ހިމެނޭގޮތަށް މި އަހަރުގެ ރިޔާސި އިންތިހާބުގައި ވާދަކުރެއްވުމަށްޓަކައި އެންމެ އިލެކްޝަންސް ކޮމިޝަނަށް ފުރަތަމަ ހުށަހެޅީ ރައީސް ޔާމީން ގެ ކެންޑިޑެސީއެެވެ. އެހެން ނަމަވެސް އެ މަނިކުފާނަށް އިންވާފައިވާ ޖަލު ހުކުމާއި، އެ ހުކުމާއި ގުޅިގެން އެ މަނިކުފާނުގެ އިސްތަށިފުޅުގައި އެޅިފައި އޮތް ދަރަނީގެ ސަބަބުން ރައީސް ޔާމީންގެ ކެންޑިޑޭސީ ބަަލއި ނުގަތުމަށް އިލެކްޝަންސް ކޮމިޝަނުން ނިންމައި އެކަން އެ ކޯލިޝަނަށް އެންގިއެވެ. 

މި ނިންމުން ގަބޫލު ނުކުރާކަމަށްބުނެ ޕީޕީއެމް ގެ ފަރާތުން މި މައްސަލަ ސުޕްރީމް ކޯޓަށް ވެއްދިވެސް މެއެވެ. އެހެން ނަމަވެސް އެ ކޯޓުންވެސް ރައީސް ޔާމީންގެ ކެންޑިޑެސީ މައްސަލައިގައި އިލެކްޝަންސް ކޮމިޝަނުން ނިންމި ނިންމުމަކީ ރަނގަޅު ނިންމުމެއް ކަމުގައި ކަނޑައެޅުމާއެކު މިއަހަރުގެ އިންތިހާބުގައި ވާދަކުރުމަށް ޔާމީނަށް އޮތް ހަމައެކަނި ފުރުސަތު ބަންދުވީއެވެ. 

ޕީޕީއެމް އިން ފުރަތަމަ ބުނެފައިވަނީ ރައީސް ޔާމީނަށް އިންތިހާބުގައި ވާދަނުކުރެވޭ ހާލަތެއްގައި ޕީޕީއެމްގެ ފަރާތުން އިތުރު ކެނޑިޑޭޓަކު ނިކުމެ ވަޑައިގަންނަވާނެކަމަށެވެ. އަދި ޕީއެންސީގެ ރިޔާސީ ކެނޑިޑޭޓް ޑރ މުއިއްޒުއަކީ ކޯލިޝަންގެ ޕްލޭން ސީ ކަމުގައި ޑރ ޖަމީލްވެސް އޭރު ވިދާޅުވިއެވެ. 

އެހެންނަމަވެސް ރައީސް ޔާމީނަށް އިންސާފު ގާއިމްކޮށް ނުދެވުނުކަމަށް ބުނެ މިއަހަރުގެ ރިޔާސި އިންތިހާބު ބޮއެކެޓް ކޮށްލުމަށް އެ މަނިކުފާނު ޕީޕީއެމްއަށް ގޮވާލެއްވިއެވެ. 

މިކަމާއިމެދު ގޮތެއް ނިންމުމަށް ޕީޕީއެމް/ޕީއެންސީގެ ސެނެޓުގައި މަޝްވަރާ ކުރެއްވުމަށްފަހު އެ ނިންމުން ބަދަލުކުރެއްވުމަށް ރައީސް ޔާމީނަށް ލަފާ އެރުވުމަށް ނިންމެވި ނަމަވެސް އެ ނިންމެވުން އެ މަނިކުފާނުން ބަަލައި ނުގަންނަވާކަން ރޭގެ އިރާކޮޅުގެ ވަގުތެއްގައި ފޯނުން އަނބިކަނބަލުންނަށް ވަނީ އަންގަވާފައެވެ. 

އަނެއްކާވެސް ސެނެޓްގައި މަޝްވަރާ ކުރެއްވުމަށްފަހު ނިންމީ، އިންތިހާބު ބޮއެކޮޓް ކުރުމަށް ނިންމެވި ނިންމުން ބަދަލުކުރެއްވުމަށް ރައީސް ޔާމީނާއި މަޝްވަރާކުރެއްވުމަށެވެ. 

އެޔާއެކު އެ މަނިކުފަނުގެ ނިންމެވުން ބަދަލުކުރައްވައި މި އަހަރުގެ ރިޔާސީ އިންތިހާބުގައި ޕީޕީއެމް/ޕީއެންސީގެ ފަރާތުން ވާދަކުރައްވާނެ ކެނޑިޑޭޓަކީ ޑރ މުހައްމަދު މުއިއްޒުކަމަށް ކަނޑައަޅައި އެ ބޭފުޅާއަށް ރައީސް ޔާމީންގެ ފުރިހަމަ ތާއީދު އޮތްކަން މިއަދު ވަނީ އިއުލާނުކުރައްވައިފައެވެ.