ޕީޕީއެމް/ޕީއެންސީގެ ރިޔާސީ ކެނޑިޑޭޓް ޑރ މުއިއްޒުގެ ރިޔާސީ ކެމްޕެއިންގެ ފުރަތަމަ ހަރަކާތް މިއަދު ފަށައި، ކެމްޕެއިން ފެށުމުގެ ގޮތުން ހުޅުމާލޭ ދެވަނަ ފިޔަވަހި ސަރަހައްދުގައި ދިރިއުޅޭ ފަރާތްތަކުގެ ދެތަކަށް ޒިޔާރަތްކޮށް ކުރިއަށް ގެންދިޔަ ދޮރުން ދޮރަށް ހަރަކާތަށް އެ ސަރަހައްދުން ހޫނު ތަރުޙީބެއް ލިބިއްޖެއެވެ. 

ރައީސް ޔާމީނުގެ ވެރިކަމުގައި ކުރިއަށް ގެންދިޔަ، ރާއްޖޭގައި މިހާތަނަށް ކުރިއަށް ގެންދެވުނު ބޯހިޔާވަހިކަމުގެ އެންމެ ބިޔަ މަޝްރޫޢު، ހިޔާ ފްލެޓް ސަރަހައްދުގައި ދިރިއުޅޭ ފަރާތްތަކުގެ ހާލު ބެއްލެވުމުގެ ގޮތުން ޑރ މުއިއްޒު މިއަދު ހަވީރުވަނީ އެ ފްލެޓްތަކުގައި ދިރިއުޅޭ ފަރާތްތަކާއި ބައްދަލު ކުރައްވައިފައެވެ. 

ހިޔާ ފްލެޓްގައި ދިރިއުޅޭ ފަރާތްތަކަށް ޒިޔާރަތްކުރައްވައިއެ ފަރާތްތަކުގެ ހާލަތު ޑރ މުޢިއްޒު ބައްލަވަނީ

މުއިއްޒަށް މަރުހަބާ ދެއްނެވުމަށްޓަކައި އިދިކޮޅު ޕީޕީއެމް-ޕީއެންސީ ކޯލިޝަންގެ ގިނަ ސަޕޯޓަރުން އެ ސަރަހައްދަށް އެއްވެ ވަރަށް ހޫނު މަރުހަބާއެއްވަނީ އެ މަނިކުފާނަށް ވިދާޅުވެފައެވެ. 

ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުالله ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލުމުން ޕީއެންސީގެ ކެންޑިޑޭޓެއްގެ ގޮތުގައި އެ ޕާޓީ ހިމެނޭ ކޯލިޝަނުން ވާދަކުރައްވަނީ، މާލޭ ސިޓީގެ މޭޔަރުކަންވެސް މިހާރު ކުރައްވަމުން ގެންދަވާ ޑރ މުހައްމަދު މުޢިއްޒުއެވެ. 

މިހާރު މާލޭގެ މޭޔަރު ކަމުގެ މަގާމުގައި ހުންނެވި މުއިއްޒު ވަނީ ކުރީގެ ރައީސް ޑރ.މުހައްމަދު ވަހީދުގެ ސަރުކާރާއި އަދި ކުރީގެ ރައީސް ޔާމީންގެ ސަރުކާރުގައި ހައުސިން މިނިސްޓަރުކަން ކުރައްވާފައެވެ.