ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރާއި ދެކޮޅަށް އިހްތިޖާޖު ކުރަމުންދިޔަ އުމުރުން ދުވަސްވީ މުސްކުޅިންނަށް ޝީލްޑް އަޅައިގެން ތިބި ފުލުހުންތަކެއް، އަނިޔާ ކުރާ މަންޒަރު ފެންނަ ވީޑިއޯ އެއް މީސްމީޑިއާގައި އާއްމުވެއްޖެ އެވެ. 

މީސް މީޑިއާގައި އާއްމުވެފައިވާ އެ ވީޑިއޯ އިން ފެންނަ ގޮތުން، ޕީޕީއެމް ދިދަ އެއް ހިފައިގެން ހުރި މުސްކުޅިއެއް ފަހަތަށް ޖެއްސުމަށްޓަކައި ޝީލްޑް އަޅައިގެން ހުރި ފުލުހަކު އެ މުސްކުޅި މީހާ ކޮށްޕާލައެވެ. އެއަށްފަހު، ޝިލްޑުންވެސް ވަރަށް ބާރު ލާފައި އެ މީހާ ކޮށްޕާ މަންޒަރު ފެނެއެވެ. 

މީގެ އިތުރުން، އެހެން މުސްކުޅިއެއް ގައިގައި ފުލުހަކު ފައިން ޖަހާތަނާ، އޭގެ ބަދަލުގައި އެމީހާ ފުލުސް މީހާ ގައިގައި ދިދައިން ޖަހާތަން އެ ވީޑިއޯ އިން ފެނެއެވެ. 

Advertisement

ޚިޔާލު ފާޅު ކުރުމުގެ މިނިވަންކަން ތަން މިނަށް ހުޅުވާލެވިފައިވާ ކަމަށާ، އިހްތިޖާހު ކުރާ މީހުންނަށް އަނިޔާ ނުކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކެންޕެއިންގެ ތެރެއިން ވިދާޅުވަމުންދާއިރު، އިހްތިޖާޖު ކުރާ މުސްކުޅިންނަށް އެފަދަ ގޮތަކަށް އަނިޔާވެރިވާތީ ގިނަ ބައެއްގެ ފާޑުކިޔުންތައް އަންނަނީ ސަރުކާރަށް އަމާޒުވަމުންނެވެ. 

އަދި އިހްތިޖާޖުގެ އުމުރުން ދުވަސްވީ ބައިވެރިންނާމެދު އެފަދަ އަނިޔާވެރި ގޮތަކަށް ފުލުހުން ޢަމަލު ކުރާ މަންޒަރު ފެންނަ ވީޑިއޯ ތައް މީސްމީޑިއާގައި ދައުރުވާތާ 11 ގަޑިއިރަށްވުރެ ގިނަ އިރު ވެފައިވާއިރު، އެކަމާއި ގުޅިގެން، އެކަން ކުށްވެރިކޮށް ހިޔުމަން ރައިޓްސް ކޮމިޝަނުން މިހާތަނަށް ބަޔާނެއް ނުވަތަ ޓުވީޓެއްވެސް ކޮށްލާފައި ނުވެއެވެ.