ސަރުކާރުގެ ޣައިރު ޤާނޫނީ ޢަމުރުތަކަށް ތަބާނުވުމަށް ދިވެހި ފުލުހުންނަށް އިދިކޮޅުުން ގޮވާލައިފި އެވެ. 

އިދިކޮޅުން މިފަދައިން ގޮވާލީ ގއ. ވިލިނގިލީގައި، އިޙުތިޖާޖު ކުރަމުން ދިޔަ ފަރާތްތަކަށް ފުލުހުން މެދުވެރިކޮށް އަނިޔާކޮށް ހާލަތާއި ނުބައްދަލު ބާރުގެ ބޭނުން ކޮށްފައި ވާތީ އެކަން ކުށްވެރިކޮށް ނެރުނު ބަޔާނެއްގައެވެ. 

އިދިކޮޅުގެ ބަޔާނުގައި ބުނީ، މި ސަރުކާރުން، އެ ކޯލިޝަންގެ ލީޑަރު، ރައީސް ރައީސް ޢަބްދުالله ޔާމީން ޢަބްދުލްޤައްޔޫމާއި އެމަނިކުފާނުގެ ޢާއިލާއަށް ނުޙައްޤުން އަނިޔާވެރިވެ، ޖަލުގައި ބަންދުކޮށްފައިވާ ކަމަށެވެ. އަދި ރައީސް އިބްރާހީމް މުޙައްމަދު ޞާލިޙު ގއ. ވިލިނގިއްޔަށް ކެމްޕެއިން ދަތުރެއްގައި އަރާވަޑައިގަތުމުން އެކަމާއި ދެކޮޅަށް އަޑު އުފުލާ ސުލްޙަވެރިކަމާއެކު އިޙުތިޖާޖު ކުރަމުން ދިޔަ ގއ. ވިލިނގިލީގެ އެތައް ރައްޔިތުންނަކަށް ފުލުހުން މެދުވެރިކޮށް ހާލަތާއި ނުބައްދަލު ބާރުގެ ބޭނުންކޮށް އެރައްޔިތުންނަށް އަނިޔާކޮށްފައިވާ ކަމަށެވެ. އެހެންކަމުން އެކަން ހަރުކަށި އިބާރާތުން ކުށްވެރިކުރާ ކަމަށްވެސް އިދިކޮޅުުން ބުނެފައިވެއެވެ.

Advertisement

އިދިކޮޅުން ބުނީ، ޤާނޫނުއަސާސީއާއި ޤާނުނު ތަކުން ދިވެހި ރައްޔިތުންނަށް ލިބިދޭ ޚިޔާލުފާޅުކުރުމާއި އެއްވެ އުޅުމާއި އިޙުތިޖާޖު ކުރުމުގެ ޙައްޤަށް ސަރުކާރުން އަރައިގަނެ، އެ ކޯލިޝަންގެ އިސް ސަފުގައި މަސައްކަތް ކުރައްވާ ގއ. ވިލިނގިލީގެ 3 ބޭފުޅަކު އަނިޔާވެރިކަމާއެކު ހައްޔަރުކޮށްފައިވާ ކަމަށެވެ. އެކަން އެ ކޯލިޝަނުން ބަލައިނުގަންނަ ކަމަށްވެސް ބަޔާނުގައި ވެއެވެ. 

"ސުލްޙަވެރިކަމާއެކު، ޚިޔާލުފާޅުކުރުމާއި އެއްވެ އުޅުމަކީ ޤާނޫނުއަސާސީ އިން ދިވެހިރައްޔތުންނަށް ކަށަވަރުކޮށްދޭ އަސާސީ ޙައްޤަކަށްވާއިރު، އެކަންކަމަށް ހުރަސް ނޭޅުމަށް ސަރުކާރަށް ގޮވާލަމެވެ. އަދި ސަރުކާރުގެ ޣައިރު ޤާނޫނީ ޢަމުރުތަކަށް ތަބާނުވުމަށް ދިވެހި ފުލހޔުންނަށް ގޮވާލަމެވެ." އިދިކޮޅުގެ ބަޔާނުގައި ވެއެވެ. 

އެއާއެކު އެ ބަޔާނުގައި ވަނީ ރައީސް ޔާމީނާއި އެމަނިކުފާނުގެ ޢާއިލާއަށް ކުރަމުން ގެންދާ އަނިޔާ ހުއްޓާލައި އެމަނިކުފާނު މިހާރުން މިހާރަށް މިނިވަން ކުރުމަށް ގޮވާލާފައެވެ.