މިސަރުކާރުން ފަށައިފައިވާ ތަރައްޤީގެ އެއްވެސް މަޝްރޫޢުތައް ހުއްޓައިނުލާނެ ކަމަށް އިދިކޮޅު ކެންޑިޑޭޓު ޑރ މުޙައްމަދު މުޢިއްޒު ވިދާޅުވެއްޖެއެވެ.

މާލޭ ސިޓީގެ މޭޔަރު ކަންވެސް ކުރައްވަމުން ގެންދަވާ މުޢިއްޒު މިހެން ވިދާޅުވީ ބޮޑު ތިލަދުން މައްޗަށް ކުރައްވަމުން ގެންދަވާ ކެމްޕޭނު ދަތުރުފުޅުގައި ހދ ހަނިމާދޫ އަށް މިއަދު ކުރެއްވެވި ޒިޔާރަތުގައި އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ޑރ މުޢިއްޒު ވިދާޅުވީ މި ސަރުކާރުން ފަށައިފައިވާ ތަރައްޤިގެ އެއްވެސް މަޝްރޫޢުއެއް ހުއްޓައިނުލައްވާނެކަމަށާއި އެއީ ތަރައްޤީގެ ފިކުރުގެ ބަޔަކު ކުރާނެކަމެއް ނޫންކަމަށެވެ.

Advertisement

ހަނިމާދޫ ޕީޕީއެމް ޖަގަހައިގައި ވާހަކަދައްކަވަމުން ޑރ މުޢިއްޒު ވިދާޅުވީ ރަށަށް އަންނަން އޮތް އެއްވެސް ތަރައްޤީއެއް ހުއްޓައިނުލައްވާނެކަމަށާއި މިހާރު ހިނގަމުންދާ އެއްވެސް ކަމެއް ހުއްޓައިލުމަކީ ތަރައްޤީގެ ފިކުރުގައި ކުރާނެ ކަމެއް ނޫން ކަމަށެވެ.

އެކަން ފާހަގަކުރައްވާ މުޢިއްޒު ވަނީ ޕީޕީއެމް ޕީއެންސީއަކީ ތަރައްޤީގެ ފިކުރުގެ ޕާޓީއެއްކަމަށް ވިދާޅުވެފައެވެ.

 މުޢިއްޒު ވިދާޅުވީ ހަނިމާދޫގައި ހިނގާ ތަރައްޤިގެ މަޝްރޫއުތައް ފާހަގަކުރައްވާ ވިދާޅުވީ ރަށުގެ އެއާޕޯޓު ފަދަ މަޝްރޫއުތައް ރަނގަޅަށް ކުރިއަށް ގެންދެވޭ ނަމަ ވަރަށް ފައިދާތައް ވާނެކަމަށާއި، އެގޮތުން އެކަން ރަނގަޅަށް ކުރިއަށް ގެންދެވިއްޖެ ނަމަ ރަށުގައި ވަޒީފާގެ ފުރުސަތުތައް ފަހިވާނެކަމަށާއި ވިޔަފާރިއަށްވެސް ފައިދާ ވާނެކަމަށް ޑރ. މުއިއްޒު ވިދާޅުވިއެވެ.

ޑރ. މުޢިއްޒު ވިދާޅުވީ އެއާޕޯޓު މަޝްރޫޢު މިހާރު ކުރިއަށް ގެންދަނީ އެންމެ ރަނގަޅަށް ނޫންކަމަށާއި އެ މަޝްރޫޢު މިހާރު ހިންގާ ގޮތަށް ވުރެ ރަނގަޅަށް އެ މަޝްރޫޢު ކުރިއަށް ގެންދެވޭނެކަމަށެވެ.

ޑރ. މުއިއްޒު ވިދާޅުވީ ރަށަށް އެންމެ ފައިދާވާގޮތަށް ކަންކަން ކުރިއަށް ގެންދިއުމަކީ އެންމެ ރަނގަޅު ގޮތްކަމަށާއި ޕީޕީއެމްއަކީ ތަރައްޤީއަށް ލޯބި ކުރާ ތަރައްޤީ ގެންނަން ބޭނުންވާ ބައެއް ކަމަށެވެ. އަދި އެކަން ރައީސް ޔާމީންގެ ފަސް އަހަރު ވާނީ ސާބިތުކޮށްދީފައި ކަމަށްވެސް އޭނާ ވިދާޅުވިއެވެ.

ޕީޕީއެމް ޕީއެންސީގެ ކެންޑިޑޭޓެއްގެ ގޮތުގައި ޑރ މުޢިއްޒު ވާދަކުރެއްވުމަށް ހަމަޖެހިފައިވާއިރު ޑރ މުޢިއްޒުއަކީ ރައީސް ޔާމީންގެ ދައުރުގެ ހައުސިންގ މިނިސްޓަރ އެވެ.