މަޤާމުގެ ޢިއްޒަތާއި ހައިބަތަށްޓަކައި މަޤާމު ބޭނުން އެއްވެސް މީހަކަށް އެއްވެސް މަޤާމެއް ނުދެއްވާނެ ކަމަށް އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.
ޑރ މުޢިއްޒު މިހެން ވިދާޅުވީ ރޭ ކުޅުދުއްފުށީގައި ބޭއްވި ކެމްޕޭނު ޖަލްސާއެއްގައި ވާހަކަފުޅު ދައްކަވަމުންނެވެ.
ކުޅުދުއްފުށީގައި ބޭއްވުނު ޖަލްސާގައި ވާހަކަ ދައްކަވަމުން މުޢިއްޒު ވަނީ ރާއްޖެއަށް ޚާއްސަކޮށް ކުޅުދުއްފުށީގެ ތަރައްޤީއަށްޓަކައި ކޮށްދެއްވާނެ ކަންކަމާއި މެދު ވާހަކަ ދައްކަވައިފައެވެ.
އެކަންކަމާއި މެދު ވާހަކަދައްކަވަމުން ޑރ މުޢިއްޒު ވިދާޅުވީ އެއީ ސީރިއަސް އަދި ޤައުމެއްގެ ކަންކަން ހައްލު ކުރާ ގޮތުގެ ވާހަކަތައް ކަމަށެވެ. އެހެންކަމުން އެމަސައްކަތް ތައް ކުރުމަށް މަޤާމުތަކަށް އަންނަ މީހުން ވެސް ވާން ޖެހޭނީ ސީރިއަސްކަމާ އެކު، ޒިންމާއަދާކުރެވޭ ފެންވަރުގެ މީހުންނަށް ކަމަށެވެ.
ޑރ މުޢިއްޒު ވިދާޅުވީ އޭނާގެ ސަރުކާރެއްގައި މިނިސްޓަރު ކަމުގެ މަޤާމަށް ވިޔަސް އަދި ސަރުކާރުގެ ކުންފުންޏެއްގެ މެނޭޖިން ޑިރެކްޓަރެއްގެ ވަޒީފާއަށް އަންނަން އުއްމީދު ކުރާ މީހަކަށް ވިޔަސް، އެ މީހަކީ، މަޤާމުގެ ހައިބަތާއި ނަމާއި ޢިއްޒަތުގެ ބޭނުމުގައި އެ މަޤާމު ހޯދަން ބޭނުންވާ މީހަކަށްވާ ނަމަ މަޤާމުނުދެއްވާނެ ކަމަށެވެ.
"ރޭގަނޑު ދަންވަރު 3 ޖަހާއިރު ވެސް އަޅުގަނޑުމެންގެ ކޯލެއް ހިނގައިދާނެ، ކޮންމެވެސް ކަމެއް ހައްލުކުރަން، އެ ކޯލު ނަގައި އެ ކަމަކަށް އެ ވަގުތުން ވަގުތަށް އެޓެންޑު ކުރެވޭނެ މީހުން ނޫނީ މަޤާމުތަކަށް ނުލާނަން" މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ މަޤާމުތަކަށް އަންނަ މީހަކީ މަޤާމުގެ ޒިންމާ ވަރަށް ސީރިއަސްކަމާ އެކު ރައްޔިތުންނަށްޓަކައި އިޚްލާސްތެރިކަމާ އެކު އަދާކުރާ ފަރާތަކަށް ހައްދަވާނެ ކަމަށެވެ.
ސެޕްޓެމްބަރު 9 ގައި ރިޔާސީ އިންތިޚާބު ބޭއްވުމަށް ހަމަޖެހިފައިވާއިރު އިންތިޚާބުގައި ވާދަކުރުމަށް 8 ކެންޑިޑޭޓަކު ދަނީ ކެމްޕޭނު ކުރައްވަމުންނެވެ. ކޮންމެ ބޭފުޅަކުވެސް ދަނީ ޤައުމުގެ ތަރައްޤީއާއި ރައްޔިތުންގެ ކުރިއެރުމަށްޓަކައި ކޮށްދެއްވަވާނެ ކަންކަން އިޢުލާނު ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
