އިސްލާމް މާއްދާ އިނގިރޭސި ބަހުން ކިޔަވައިދިނުމަކީ ދިވެހި ގައުމިއްޔަތު ގެއްލުވާލުމަށް ކުރާ މަސައްކަތުގެ ފެށުމެއް ކަމަށް ޕީޕީއެމް ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
"އުފާވެރި ދިރިއުޅުން" ގެ ނަމުގައި ރައީސް އިބްރާހިމް މުޙައްމަދު ޞާލިހުގެ ރިޔާސީ މެނިފެންޓޯގެ ފުރަތަމަ ބައި އިއުލާންކުރިއިރު، އެ މެނިފެސްޓޯގެ ދަށުން "މާދަމާގެ މީހާ މިއަދު" ގެ ނަމުގައި އާންމުކުރި ތައުލީމީ ދާއިރާގެ ވައުދުތަކުގެ ތެރޭގައި ވަނީ އިސްލާމް މާއްދާ އިނގިރޭސި ބަހުން ކިޔަވަން ބޭނުންވާ ކުދިންނަށް ސްކޫލް ނިޒާމުގެ ތެރެއިން ފަހިކޮށްދިނުމަށް ވަނި ވަޢުދުވެފައެވެ.
އެކަމަށް ފާޑުވިދާޅުވެ ރޭ ހއ. އިހަވަންދޫގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ޑރ. މުއިއްޒު ވިދާޅުވީ އިނގިރޭސި ބަހުން އިސްލާމް މާއްދާ ކިޔަވައި ދިނުމަކީ ދިވެހި ގައުމިއްޔަތު ގެއްލުވާލުމަށް ސަރުކާރުން ރާއްވައިގެން ކުރާ މަސައްކަތެއް ކަމަށެވެ.
"މިހާރު މި އިވެނީ ދިވެހި ބަހުގެ ބަދަލުގައި އިނގިރޭސީ ބަހުން އިސްލާމް މާއްދާއާއި މިހުރިހާ އެއްޗެއް ކިޔަވައިދޭން އުޅޭވާހަކަ. ގައުމިއްޔަތު ގެއްލުވައިލުމުގެ މަސައްކަތް މިވަނީ ފެށިފައި. މިކަމަށް ނިމުން ގެންނަންޖެހޭ،"
ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު
ޑރ. މުއިއްޒު ވިދާޅުވީ އިސްލާމް ދީނާއި ދިވެހި ބަހަކީ ގައުމިއްޔަތާ އެންމެ ބޮޑަށް ގުޅިފައިވާ ދެ އަސާސް ކަމަށެވެ. ގައުމުގެ މުސްތަގުބަލާއި މިނިވަންކަން ސަލާމަތް ކުރަން ބޭނުންވާނަމަ އިސްލާމް ދީނާއި ދިވެހި ބަސް ހިމާޔަތް ކުރަންޖެހޭނެ ކަމުގައި ވިދާޅުވި އެވެ.
"ގައުމުގެ މިނިވަންކަމާ ގުޅިފައި ވަނީ އިސްލާމް ދީން. އިސްލާމް ދީނާއި, ދިވެހި ބަހާ ހިމާޔަތްކޮށްގެން ގައުމުގެ މުސްތަގުބަލު ސަލާމަތްކުރެވޭނީ, އަމާން ކުރެވޭނީ, އުޖާލާ ކުރެވޭނީ"
ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު
ޑރ. މުއިއްޒު އިތުރަށް ވިދާޅުވީ, ޕީޕީއެމް ނޫނީ މިނިވަންކަމާއި ގައުމިއްޔަތު ހިމާޔަތްކޮށްދޭނެ ޕާޓީއެއް ދިވެހިރާއްޖޭގައި ނެތްކަމަށެވެ. އެހެންކަމުން ގައުމު ސަލާމަތް ކުރެވޭނެ ހަމައެކަނި ގޮތަކީ ޕީޕީއެމަށް ވެރިކަން ހަވާލު ކޮށްގެން ކަމަށް ޑރ. މުއިއްޒު ވިދާޅުވިއެވެ.
"އެހެން ނޫނީ މިފެންނަ ގޮތަށް ކަންކަން ދާން ދޫކޮށްލާފިއްޔާމު ތާއަބަދަށް ގައުމުގެ މިނިވަންކަމާއި ގައުމީއްޔަތު އޭގެ ހަގީގީ މާނާގައި އެ ވާހަކަ ދެއްކުމުގެ ފުރުސަތެއް ނުލިބޭނެ."
ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒު
މުޢިއްޒުގެ އިތުރުން އިސްލާމް މާއްދާ އިނގިރޭސި ކުރަން ރައީސް ޞާލިހުގެ މެނިފެސްޓޯ ގައި ހިމަނާފައިވާތީ ދީނީ ޢިލްމުވެރިންވެސް އަންނަނީ އެކަމާއި ކަންބޮޑުވުން ފާޅުކުރައްވަމުންނެވެ. އެގޮތުން، އެފަދައިން ކަން ކޮށްފިނަމަ، ބޭރުގެ ޣައިރު މުސްލިމުންނާއި، ތަފާތު ފިރުގާ ތަކުގެ މީހުން އިސްލާމްދީން ކިޔަވައި ދިނުމަށް ގެންނާނެ ކަމުގެ ބިރު އޮތް ކަމަށް ޢިލްމުވެރިން ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
