ޕީޕީއެމް ޕީއެންސީގެ މެނިފެސްޓޯ މާދަމާ އިޢްލާނުކުރުމަށް އެޕާޓީއިން ނިންމައިފިއެވެ.

ޕީޕީއެމުން ބުނެފައިވަނީ އެޕާޓީގެ "ދިވެހީންގެ ރާއްޖެ" ނަމުގައި ނެރޭ މެނިފެސްޓޯ ނެރުމަށް ހަމަޖެހިފައިވަނީ  އާދީއްތަ ދުވަހުގެ ރޭ ހުޅުމާލޭ ދެވަނަ ފިޔަވަހީގެ ފުރަތަމަ ބަސްހުއްޓީގެ ކުރިމަތީގައި އޮންނަ ހުސް ބިމުގައި ކަމަށެވެ.

ޕީޕީއެމް ޕީއެންސީގެ ކޯލިޝަންގެ ފަރާތުން ރިޔާސީ އިންތިޚާބުގައި  ވާދަކުރެއްވުމަށް ތައްޔާރުވަމުން ދަނީ މިހާރު މާލޭގެ މޭޔަރެއްގެ ގޮތުގައި ހުންނެވި ޑރ މުޙައްމަދު މުޢިއްޒުއެވެ. އަދި އޭނާގެ ރަނިންގމޭޓެއްގެ ގޮތުގައި ވާދަކުރައްވާނީ ފަރެސްމާތޮޑާ ދާއިރާގެ މެމްބަރު މުޙައްމަދު ހުސެއިން ލަތީފެވެ.

ޕީޕީއެމް ޕީއެންސީގެ ކެންޑިޑޭޓޭއްގެ ގޮތުގައި ޑރ މުޢިއްޒު ނެރުމަށް އެކޯލިޝަނުން ނިންމީ މިހާރު ޖަލުގައި ހުންނެވި ކުރީގެ ރައީސް ޔާމިން ޢަބްދުލްޤައްޔޫމްއަށް ރިޔާސީ އިންތިޚާބުގައި ވާދަ ނުކުރެވޭނެ ކަމަށް ސްޕްރީމް ކޯޓުން ނިންމުމާއި ގުޅިގެނެވެ.

ރިޔާސީ އިންތިޚާބުގައި 8 ކެންޑިޑޭޓަކު ވާދަކުރުމަށް ނިންމަވާފައިވާއިރު އޭގެ ތެރޭގައި އަމިއްލަ ގޮތުން ވާދަކުރައްވާ 3 ކެންޑިޑޭޓްކު ހިމެނެއެވެ. އަދި ފަސް ކެންޑިޑޭޓަކު ވާދަކުރައްވަނީ އަމިއްލަ ގޮތުންނެވެ.

އިންތިޚާބަށް ކުޑަ ދުވަސްކޮޅަކަށް ވެފައިވާއިރު ހުރިހާ ކެންޑިޑޭޓުންވެސް ދަނީ މެނިފެސްޓޯ އިޢްލާނު ކުރެއްވުމާއި ކެމްޕޭނު ކުރެއްވުމާއި އެކި ދާއިރާތަކާއި އެކި ރަށްރަށަށް އެކި ކަންކަން ކޮށްދެއްވުމަށް ވަޢުދުތައް ވެވަޑައިގަންނަވަމުންނެވެ.