ގުރުއާން ބާވައިލެއްވީ އަރަބި ބަހުން ކަމަށާއި ހަދީސްތައް ވެސް ރިވާވެގެން ވަނީ އަރަބި ބަހުންކަމަށާއި މީގެ އިތުރުން އިސްލާމް ދީނަކީ އަޤީދާ ކަމަށާއި ދިވެހި ބަހާއި އިސްލާމް ދީނާ ސީދާ ގުޅުމެއް ނެތްކަމުގައި ރައީސް ޞާލިޙްގެ ތަރުޖަމާނު އަދި ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ.
މިނިސްޓަރ މާރިޔާ މިފަދައިން ވިދާޅުވީ ސޯލްޓް ކެފޭ ހުންނަ ޝައިންޓްރީ ބިލްޑިންގައި ގާއިމްކޮށްފައިވާ ރައީސް ސޯލިހުގެ ކެމްޕެއިން އޮފީހުގައި މިއަދު ހެނދުނު ބޭއްވި ނޫސްވެރިންގެ ބައްދަލުވުމެއްގައި، އެމްޑީޕީގެ ރިޔާސީ މެނިފެސްޓޯގައި އިނގެރޭސި ބަހުން އިސްލާމް މާއްދާ ކިޔަވައިދިނުމަށް ހިމަނައިފައި އޮތް އޮތުމަށް އިދިކޮޅު ފަރާތްތަކުން ކިޔަންދާ ފާޑުކިޔުންތާމެދު ވިދާޅުވަނީ ކީކޭތޯ ކަމާމެދު ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.
ކުދިންނަށް ދިވެހިބަސް ކިޔަވައި ދޭންށޭ ކިޔާފައި އިސްލާމްދީން ކިޔަވައިދިނުމަކީ ކޮންމެހެން ޤައުމިއްޔަތުގެ ބައެއް ނޫން
މިނިސްޓަރ މާރިޔާ ވިދާޅުވިއެވެ.
މީގެ އިތުރުން މާރިޔާ ވިދާޅުވީ، އިސްލާމް މާއްދާ އިންގެރޭސި ބަހުން ކިޔަވައިދިނުމުގެ އެންމެ ބޮޑު ބޭނުމަކީ، ކުދިންނަށް ރަނގަޅަށް ދީން އުނގަންނައިދިނުން ކަމަށާއި ކުދިންގެ ހިތުގައި އުފެދޭ ސުވާލުތައް ވެސް ރަނގަޅަށް އޮޅުން ފިލުވައިދިނުން ކަމަށެވެ.
އެމްޑީޕީގެ ރިޔާސީ މެނިފެސްޓޯގައި އިނގެރޭސި ބަހުން އިސްލާމް މާއްދާ ކިޔަވައިދިނުމަށް ހިމަނައިފައިވުމުން އެކަމާއި އިދިކޮޅު ފަރާތްތަކުގެ އިތުރުން އާންމު ގިނަ ބަޔަކު އަންނީ ފާޑު ކިޔަމުންނެވެ.
Advertisement
This content is created and paid for by advertisers and does not involve Voice Journalists
