ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ހުޅުމާލެ، މާލެ ސިޓީ ކައުންސިލްގެ ދަށަށް ބަދަލުކުރައްވާނެކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައިވަނީ މި ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ މެނިފެސްޓޯ "ދިވެހީންގެ ރާއްޖެ" އިފްތިތާހުކޮށް، އެ މެނިފެސްޓޯގެ ދަށުން ބޯހިޔާވަހިކަން ކަށަވަރުކޮށްދިނުމަށް ކުރައްވާނެ ކަންކަން އިއުލާނުކުރުމަށް އާދިއްތަ ދުވަހުގެ ރޭ ހުޅުމާލޭ ފޭސް 2 ގައި ބޭއްވި ބޮޑު ޖަލްސާގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ މާލެ، ވިލިމާލެ އަދި ހުޅުމާލެ އަކީ މާލެ ސިޓީގެ ތަންތަން ކަމަށެވެ. އެހެން ނަމަވެސް ހުޅުމާލޭގެ ކަންކަން މިހާރު ހަވާލުވެފައި އޮންނަނީ ސަރުކާރު ކުންފުންޏަކާއި ކަމަށެވެ. އެކަމުގެ ސަބަބުން ހުޅުމާލެ ސިޓީގެ ކަންކަން ބަލައި، އެ ސިޓީގެ ރައްޔިތުންނަށް ދިމާވާ މައްސަލަތައް ޙައްލުކުރުމަށް ބޮޑެތި ގޮންޖެހުންތައް ކުރިމަތިވަމުން އަންނަކަން ޑރ މުއިއްޒު ފާހަގަކުރެއްވި އެވެ. 

Advertisement

ޑރ މުއިއްޒު މާލޭ ސިޓީގެ މޭޔަރަށް ހޮވިވަޑައިގަތުމާއި އެކު، ހުޅުމާލޭގެ ރައްޔިތުންގެ އެދުމާއެކު ވަނީ އެ ސިޓީގެ ކަންކަން ކައުންސިލްގެ ދަށަށް ބަދަލުކޮށްދިނުމަށް ސަރުކާރުގައި ދަންނަވާފަ އެވެ. އެހެން ނަމަވެސް މިހާތަނަށް ސަރުކާރުން އެކަމަށް އިޖާބަ ދީފައެއް ނުވެއެވެ.

ޑރ މުއިއްޒު ވިދާޅުވީ ހުޅުމާލޭގެ މުނިސިޕަލް ކަންކަން ކުންފުންޏަކާއި ހަވާލުކޮށްފައިވަނީ ގާނޫނާއި ޚިލާފަށް ކަމަށެވެ. 

ހުޅުމާލެ ސިޓީއަކީ ވެސް މާލޭގެ ބަޔަކަށް ވުމުން، މިހާރު އެތަން ކުންފުންޏަކާއި ހަވާލުކޮށްފައި އޮތް އޮތުން ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ބަދަލުކޮށް، އެތަން މާލޭ ސިޓީ ކައުންސިލްގެ ދަށަށް ގެންނާނެކަމަށް ޑރ މުއިއްޒު ވިދާޅުވި އެވެ. 

އެއާއެކު ހުޅުމާލެ ސިޓީގެ މުނިސިޕަލް ކަންކަން މާލޭ ސިޓީ ކައުންސިލްގެ ބެލުމުގެ ދަށުން ކުރަމުން ގެންދާނެ ކަމަށާއި، އޭރުން ރައްޔިތުންނަށް ފޯރުކޮށްދޭން ޖެހޭ ޚިދުމަތް ފޯރުކޮށްދިނުމުގައި މިހާރު ދިމާވާ ދަތިތަށް ޙައްލުވެގެންދާނެ ކަމަށް ޑރ މުއިއްޒު ވިދާޅުވި އެވެ.