އެމްޑީޕީގެ ރިޔާސީ ކެންޑިޑޭޓް، އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙްގެ ކެމްޕެއިންގައި ދައުލަތުގެ ވަޞީލަތްތައް ނަހަމަ ގޮތުގައި ބޭނުން ކުރަމުންދާ ކަމަށާއި އެކަމާމެދު ފާރަވެރިވުމަށް ޓްރާންސްޕޭރެންސީން މޯލްޑިވްސްއިން ގޮވާލައިފިއެވެ.

ޓްރާންސްޕޭރެންސީން މޯލްޑިވްސްއިން މިފަދައިން ކަންބޮޑުވުން ފާޅުކޮށްފައި މިވަނީ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ޞާލިހްގެ ކެމްޕެއިންގައި އަތޮޅު ތެރޭގެ ގިނަ ރަށްތަކަކަަށް ދަތުރުތައް ކުރައްވައި ފޯރީގައި ކެމްޕެއިން ކުރިއަށް ގެންދަމުންދާ ދުވަސްކޮޅަކާއި ދިމާކޮށް މިއަދު ނެރުނު ބަޔާނެއްގައެވެ. 

އެ ބަޔާނުގައި ބުނެފައިވަނީ ސަރުކާރާއި ސަރުކާރު ހިއްސާވާ ކުންފުނިތަކުގެ ވަސީލަތްތައް ރައީސް އިބްރާހިމް މުހައްމަދު ސޯލިހަށް ދެވަނަ ދައުރެއް ހޯދައި ދިނުމަށް ނަހަމަ ގޮތުގައި ބޭނުންކުރާ ކަން ފާހަގަވެފައިވާކަމަށާއި އެކަމުގެ ސަބަބުން، އަނެއް ހަތް ކެންޑިޑޭޓުންނަށް ހަމަހަމަ ފުރުސަތު ގެއްލިފައިވާ ކަމަށެވެ. 

މީގެ އިތުރުން އެ ބަޔާނުގައި ބުނެފައިވަނީ، މިދިޔަ މަހުގެ 10 ވަނަ ދުވަހު ކެމްޕޭން ކުރުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވައިލިތާ ފުރަތަމަ 10 ދުވަހު ތަފާތު 16 ރަށެއްގައި 32 މަޝްރޫއެއް ނިންމުން ނުވަތަ ފެށުން ފާހަގަކުުރުމުގެ ރަސްމިއްޔާތަކަށް ރައީސް ވަޑައިގެންނެވި ކަމަށެވެ. އެކަމަކު، އޭގެ ތެރެއިން 8 މަޝްރޫއަކީ 2021 ވަނަ އަހަރާއި 2022 ވަނަ އަހަރު މުޅިން ނިންމާފައިވާ މަޝްރޫއުތަކެއް ކަމަށެވެ. 

އަދި މި މުއްދަތުގައި ހައުސިން މިނިސްޓްރީ މެދުވެރިކޮށް، ޖުމުލަ އެއް ބިލިއަން ރުފިޔާގެ 14 އާ މަޝްރޫއެއް ސަރުކާރުގެ ދެ ކުންފުންޏަކާ ވެސް ހަވާލުކޮށްފައިވާ ކަމަށް ޓްރާންސްޕޭރެންސީން މިއަދު ނެރުނު ބަޔާނުގައި ބުނެފައިވެއެވެ. 

ޓްރާންސްޕޭރެންސީން ގެ ބަޔާނުގައި އިތުރަށް ބުނެފައިވަނީ، މި އަމަލުތަކުގެ ސަބަބުން އިންތިހާބުގައި ވާދަކުރާ ހުރިހާ ކެންޑިޑޭޓުންނަށް ހަމަހަމަ ފުރުސަތު ނެތްއިރު، ރައީސް އިބްރާހިމް މުހައްމަދު ސޯލިހުގެ ކެމްޕޭނު ދަތުރުފުޅުތަކުގައި ރަސްމީ މަސައްކަތްތައް ކުރެއްވުމަކީވެސް އެ ޖަމިއްޔާއިން ކަންބޮޑުވާ ކަމެއްކަމުގައެވެ. 

އެހެންކަމުން، ރައީސް އިބްރާހިމް މުހައްމަދު ސޯލިހުގެ ކެމްޕޭނުގައި ދައުލަތުގެ ވަސީލަތްތައް ނަހަމަ ގޮތުގައި ބޭނުން ނުކުރުމަށް ގޮވާލައި، އެ ކަންކަމަށް އޭސީސީ އާއި އޮޑިޓާ ޖެނެރަލްގެ އޮފީހުގެ އިތުރުން ރައްޔިތުންގެ މަޖިލީހުން ވެސް ގާތުން ބަލައި، ފާރަވެރިވުމަށް ޓްރާންސްޕޭރެންސީގެ ބަޔާނުގައި ވަނީ އިލްތިމާސްކޮށްފައެވެ.