ރައީސް އިބްރާހިމް މުޙައްމަދު ބ.އަތޮޅަށް ކުރައްވަމުން ގެންދަވާ ދަތުރުފުޅުގައި ބ.ތުޅާދުއަށް ވަޑައިގަތުމުގެ ކުރިން އެރަށުގައި ތިބި އިދިކޮޅުގެ އެކްޓިވިސްޓުން ފުލުހުންގެ ބެލުމުގެ ދަށަށް ގެންގޮސްފިއެވެ.

ތުޅާދޫގައި ތިބި އިދިކޮޅު އެކްޓިވިސްޓުންގެ އެއްބަޔަކު ހައްޔަރު ކޮށްފައިވަނީ އެމީހުންގެ ގޭގައި ތިއްބައެވެ.

މިއަދު ރައީސް ޞާލިޙް އެރަށަށް ވަޑައިގަތުމަށް ހަމަޖެހިފައިވާއިރު އެރަށަށް މިހާރުވަނީ އެސްއޯ ފުލުހުންގެ 15 ވަރަކަށް ފުލުހުން ގޮސްފައެވެ.

Advertisement

ޕީޕީއެމް ތުޅާދޫ ދާއިރާގެ ނައިބު ރައީސް މުހައްމަދު އަތީފް (ތުޅާދޫ އަތީފް) ވެސް މިހާރު ވަނީ ހައްޔަރުކޮށްފައެވެ. އޭނާ އަކީ ތުޅާދޫގައި ސަރުކާރާއި ދެކޮޅަށް ކުރިއަށް ގެންދާ މުޒާހަރާތައް ލީޑް ކުރުމުގައި އެންމެ އިސްކޮށް ހަރަކާތްތެރިވާ އެކްޓިވިސްޓެވެ.

ރައީސް ޞާލިޙް ރަށަށް ވަޑައިގަތުމުގެ ކުރިން ތުޅާދޫ އިން ހައްޔަރުކުރި އިދިކޮޅު އެކްޓިވިސްޓުން މިހާރު ވަނީ އެރަށުން ފުރުވައިލައިފައެވެ.

ރައީސް ޞާލިޙް ކެމްޕޭނަށް ރަށްރަށަށް ވަޑައިގަތުމުން ބައެއް ރަށްރަށުގައި އިދިކޮޅު ފަރާތްތަކުން އަންނަނީ މުޒާހަރާ ކުރަމުންނެވެ. ބައެއް ރަށްރަށުގައި މިފަދަ ހާލަތްތަކުގައި ފުލުހުން ހާލަތާއި ނުބައްދަލު ބާރުގެ ބޭނުން ކުރާތަން ދަނީ ފެންނަމުންނެވެ.