ބ.ތުޅާދޫ ގައި އިދިކޮޅު ޕީޕީއެމްގެ އެކްޓިވިސްޓުން ތަކެއް ހައްޔަރުކުރި ކުރުން އެޕާޓީއިން ކުށްވެރިކޮށްފިއެވެ.

ބ.ތުޅާދޫ ޙަރަކާތަށް ސަރުކާރުން ހުރަސް އަޅާ ބައިވެރިންނަށް އަނިޔާކޮށް، ތަކެއްޗަށް ގެއްލުންދީ އެތައް ބަޔަކު ހައްޔަރުކުރުން އެންމެ ހަރުކަށި އިބާރާތުން ކުށްވެރި ކޮށް ޕީޕީއެމުން ވަނީ ނޫސް ބަޔާނެއް ނެރެފައެވެ.

އެބަޔާނުގައި ބުނެފައިވަނީ މިއަދު ބ. ތުޅާދޫގައި ކުރިއަށް ގެންދެވުނު ސިޔާސީ ޙަރަކާތަކަށް ސަރުކާރުން ހުރަސްއެޅުމުގެ ގޮތުން ފުލުހުން ފޮނުވާ، ސުލްޙަވެރިކަމާއެކު ކުރިއަށް ގެންދެވުނު ޙަރަކާތަށް ހުރަސްއަޅާ، ތަކެއްޗަށް އެކިވަރުގެ ގެއްލުން ދިނުމުގެ އިތުރުން، އެތައް ރައްޔިތުންނަކަށް އަނިޔާކޮށް އަދި ބައެއް ބައިވެރިން ހައްޔަރުކުރުން އެންމެ ހަރުކަށި އިބާރާތުން ކުށްވެރިކުރާ ކަމަށް އެބަޔާނުގައި ބުނެފައިވެއެވެ.

Advertisement

އަދި ތުޅާދޫގައި ހިންގި ސިޔާސީ ޙަރަކާތަކީ، އެކޯލިޝަންގެ ލީޑަރ އަދި ޕީޕީއެމްގެ ރައީސް ރައީސް ޢަބްދުﷲ ޔާމީން ޢަބްދުލްޤައްޔޫމަށް ސިޔާސީ ނުފޫޒުން ޙައްޤު ނޫން ޙުކުމެއްޖަހައި، އެމަނިކުފާނަށް ސަރުކާރުން ވަމުންދާ އަނިޔާއާއި ދެކޮޅަ އަޑުއުފުލާ އެމަނިކުފާނު މިނިވަން ކުރުމަށް ގޮވާލާ ސުލްޙަވެރިކަމާއެކު ކުރިއަށް ގެންދެވުނު ޙަރަކާތެއް ކަމަށްވެސް އެބަޔާނުގައި ވެއެވެ.

"ސަރުކާރާއި ދެކޮޅަށް އަޑު އުފުލާ ފަރާތްތަކަށް އަނިޔާވެރިވެ އެމީހުން ގެންގުޅޭ ތަކެއްޗަށް ގެއްލުންދީ އެވެސް ކުށެއްނެތި ހައްޔަރުކުރުމަކީ މިކޯލިޝަނުން ބަލައިގަންނަ ކަމެއް ނޫން އަދި އެއީ ޑިމޮކްރަސީގެ ރޫޙާއިވެސް ޚިލާފަށް ހިންގާ ޖަރީމާއެއްކަމުގައި ދެކެން" ޕީޕީއެމުން ބުނެފައިވެއެވެ.

ޕީޕީއެމުން ގޮވާލައިފައިވަނީ ޙައްޔަރުކޮށްފައިވާ އެންމެން މިހާރުން މިހާރަށް ދޫކޮށްލުމަށެވެ. އަދި ޙަރަކާތަށް ހުރަސް އެޅުމުގައި، ފުލުހުން ޙާލަތާއި ނުބައްދަލު ބާރުގެ ބޭނުންކުރުމުގެ ސަބަބުން ގެއްލުން ލިބުނު ތަކެތީގެ ބަދަލު ދިނުމަށް ގޮވާލައިފައިވެއެވެ. ހަމައެއާއެކު ޣައިރު ޤާނޫނީ ޢަމުރުތަކަށް ކިޔަމަން ނުވަމަށް އެބަޔާނުގައި ފުލުހުންނަށް ނަސޭޙަތްތެރިވެފައިވެއެވެ.