ސްކޫލްތަކުގައި ކިޔަވައިދޭ ވަގުތު ޓީޗަރުން މޫނު ބުރުގާ އެޅުން މަނާ ކުރުމާއި ގުޅިގެން ގިނަ ބައެއްގެ ފާޑުކިޔުންތައް އަމާޒުވެފައިވަނިކޮށް އެ އުސޫލު ބަދަލުކޮށް، ހަމައެކަނި 10 އަހަރުން ދަށުގެ ދަރިވަރުންނަށް ކިޔަވައިދޭ އިރު މޫނު ބުރުގާ ނަގައިގެން ކިޔަވާ ދެވޭ ގޮތަށް އެ ގަވާއިދު އިސްލާހުކޮށްފިއެވެ.
ޓީޗަރުންގެ ސުލޫކީ މިންގަނޑަށް މީގެ ކުރިން ގެނެވުނީ އިސްލާހާއެކު ކިޔަވައިދޭ ވަގުތު ޓީޗަރުން ތިބެން ޖެހެނީ ކާކުކަން އެނގޭ ގޮތަށް މޫނު ނަގައިގެންނެވެ. އެހެންވުމުން މޫނު ބުރުގާ އަޅައިގެން ކިޔަވައި ދިނުމުގެ ފުރުސަތު އޮތީ ބަންދުވެފަ އެވެ.
ނަމަވެސް އެ އިސްލާހަށް ގިނަބައެއްގެ ފާޑުކިއުންތައް އަމާޒުވެފައިވަނިކޮށް އެ އުސޫލަށް މިއަދު ގެނައި އިސްލާހު އޮތްގޮތުން ކިޔަވާ ދޭއިރު ޓީޗަރުން މޫނު ބުރުގާ ނެގުން ލާޒިމް ނުވިޔަސް، އެފަދަ ޓީޗަރުން ދަރިވަރުންނާ މުއާމަލާތު ކުރާއިރު ސްޓާފް ކާޑު އަޅަންޖެހޭނެއެވެ.
ނަމަވެސް މިއަދު ގެނެވުނު އިސްލާހުގައިވާ ގޮތުން އުމުރުން 10 އަހަރުން ދަށުގެ ކުދިންނަށް ކިޔަވާ ދޭއިރު މޫނު ހާމަކުރަން އެކަށީގެންވާ މާހައުލުތަކުގައި ކިޔަވައިދޭން ވާނީ މޫނު ބުރުގާ ނަގައިގެންނެވެ. އެކަމަކު އެ ނޫން މާހައުލުތަކުގައި އެފަދަ ކުދިންނަށް ކިޔަވާ ދޭއިރު ވެސް މޫނު ބުރުގާ އެޅިދާނެއެވެ. ނަމަވެސް އެފަދަ މާހައުލަކީ ކޮބައިކަން ގަވާއިދުގައި ބަޔާން ކޮށްފައެއް ނެތެވެ.
ސަރުކާރު މޫނު ބުރުގާ އަޅައިގެން ކިޔަވައިދިނުން މަނާކޮށް އެކުލަވާލި އުސޫލާއެކު ގިނަ ބައެއްގެ ފާޑުކިޔުންތައް ސަރުކާރަށް އައީ އަމާޒުވަމުންނެވެ. އަދި އިންތިހާބާއި މިހާ ކައިރި ވެފައިވަނިކޮށް އެ އިސްލާހަށް ބަދަލު ގެނައުމުން އެ ފިޔަވަޅަކީ ވޯޓަށް އަމާޒުކޮށްގެން އެޅި ފިޔަވަޅެއް ތޯ ގިނަބަޔަކު ދަނީ ސުވާލު އުފައްދަމުންނެވެ.
Advertisement
This content is created and paid for by advertisers and does not involve Voice Journalists
