ގދ ގައްދޫ ސިއްހީ މަރުކަޒުގައި އެޑްމިޓް ކޮށްފައިވާ ކުދިންތަކަކަށް މުއްދަތު ހަމަވެފައިވާ އައިވީތަކެއް ދިން މައްސަލައިގައި ހިމެނޭ 4 މުވައްޒަފަކަށް މައްސަލައިގެ ތަހުގީގު ނިމެންދެން ގޭގައި މަޑުކުރުމަށް އަންގައިފިއެވެ. 

ގައްދޫ ސިއްހީ މަރުކަޒުގައި މިދިޔަ މަހު ގެރެންޓީ ހަމަވެފައިވާ އައިވީ ތަކެއް ދިން މައްސަލައިގައި އެރަށު ސިއްހީ މަރުކަޒު ކުރިމައްޗަށް ގިނަ އަދަދެއްގެ މީހުން އެއްވެ ވަނީ މުޒާހަރާކޮށްފައެވެ. 

މި މައްސަލަ މިހާރު ހެލްތު މިނިސްޓްރީގެ ބެލުމުގެދަށުން ތަހުގީގު ކުރަމުން އަންނައިރު، މި މައްސަލަ ބެލުމަށްފަހު އިހުމާލުވެފައިވާ ފަރާތްތަކަށް ފިޔަވަޅު އަޅާނެ ކަމުގައި އެ މިނިސްޓްރީން ބުނެއެވެ.

މީސް މީޑިޔާގައީ އާންމުވި ވީޑިއޯތަކުން ފެންނަ ގޮތުގައި ސިއްހީ މަރުކަޒުގައި އެޑްމިޓް ކޮށްފައި އޮތް ކުއްޖެއްގެ ގަޔަށް ގުޅާފައި ހުރި އައިވީ ވެސް އޮތީ މިދިޔަ މަހު ހަމަވެފަ އެވެ. އެ ވަގުތު އެތަނުގެ ތެރޭގައި އާންމުންގެ އިތުރުން ނަރުހުންނާއި ފުލުހުން ވެސް ހަރަކާތްތެރި ވަމުންދިޔައެވެ.