ޕަބްލިކް ސާވިސް މީޑިއާ (ޕީއެސްއެމް) އާއި ދިވެހިރާއްޖޭގެ ޤައުމި ޔުނިވަސިޓީއާއި ގުޅިގެން ބާއްވަމުން އަންނަ ރިޔާސީ ބަހުސްގެ މި އަހަރުގެ ބަހުސަށް ފޮނުވުނު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ގަބޫލުކުރައްވައިފިއެވެ. 

މިކަން ހާމަކޮށް ޑރ މުއިއްޒުގެ ތަރުޖަމާނު، އަދި ޕީޕީއެމްގެ ސެކެޓްރީ ޖެނެރަލް އަހްމަދު ތޮލާލު ކުރެއްވި ޓުވީޓެއްގައި ވަނީ ރިޔާސީ ބަހުސްގައި ވާދަކުރުމަށް އޮގަސްޓް 22 ގައި ފޮނުވުނު ދައުވަތު ޑރ މުއިއްޒު ވަނީ ހަމަ އެދުވަހު ގަބޫލުކުރައްވާ އެކަން އަންގައިފައި ކަމަށެވެެ. 

މިއަހަރުގެ ރިޔާސީ ބަހުސް އޮންނާނީ ސެޕްޓެމްބަރު މަހުގެ ފުރަތަމަ ދުވަހުގެރޭ 9 ޖަހާއިރު ޓީވީއެމްގައެވެ. ބަހުސްގައި ކެންޑިޑޭޓުންގެ ތަސައްވަރާއި، ސިޔާސަތުތަކާއި، ކުރިއަށް އޮތް ފަސްއަހަރާއިމެދު އުންމީދުކުރާ ގޮތް ހާމަކުރުމުގެ ފުރުސަތު ލިބިވަޑައިގަންނަވާނެއެވެ.

މިފަހަރުގެ ރިޔާސީ އިންތިޚާބަށް 8 ކެންޑިޑޭޓުން ވާދަކުރައްވައެވެ. އޭގެތެރޭގައި ހިމެނެނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް / މުހައްމަދު އަސްލަމް (އެމްޑީޕީ)، ޑރ. މުހައްމަދު މުޢިއްޒު / ޙުސެއިން މުހައްމަދު ލަޠީފް (ޕީއެންސީ)، ގާސިމް އިބްރާހިމް / ޑރ. އަމީން އިބްރާހިމް (ޖުމްހޫރީ ޕާޓީ)، މުހައްމަދު ނާޒިމް / ޑރ. އަހުމަދު އަދީލް ނަޞީރު (އެމްއެންޕީ)، އިލްޔާސް ލަބީބް / ހުސެއިން ޢަމްރު (ދަ ޑިމޮކްރެޓްސް) އަޙްމަދު ފާރިސް މައުމޫން / ޑރ. އަބްދުއްޞައްތާރު ޔޫސުފް، އުމަރު ނަސީރު / މުހައްމަދު ސަލީމް އަދި ޙަސަން ޒަމީލް / މަރިޔަމް ޢަލީމް އެވެ.