ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ހުންނަވަނީ ވާނުވާގައި ކަމަށާއި، އެމަނިކުފާނު އެ ހާލުގައި ހުންނަވަނިކޮށް ގައުމުގެ ހިންގުން ހަވާލުކުރަން ހެޔޮނުވާނެކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ ކެނދިކުޅުދޫގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އަބްދުއްރަހީމް ވިދާޅުވީ ރައީސް ޞާލިހު ރަށްތަކަށް ކުރައްވާ ކެމްޕޭނު ދަތުރުފުޅުތަކުގައި އެމަނިކުފާނުގެ ސަރުކާރުން އެތައް މަޝްރޫއެއް ހިންގާފައިވާކަމަށް ވިދާޅުވެ ވާހަކަފުޅު ދައްކަވަމުން ގެންދަވާ ކަމަށެވެ. އަދި އެމަނިކުފާނު ވެރިކަމަށް ވަޑައިގަތުމަށް ވެލެއްވި ވައުދުތަކުގެ ބޮޑުބައި ފުއްދަވާދެވިއްޖެކަމަށް ވިދާޅުވަމުން ގެންދަވާ ކަމަށެވެ. 

Advertisement

އެހެން ނަމަވެސް ޕްރޮގްރެސިވް ކޮންގްރެސް ކޯލިޝަނުން ކެމްޕޭނަށް ހަމަ އެރަށްތަކަށް ވަޑައިގަތުމުން ރައްޔިތުން ފާޅުކުރަމުންދަނީ ތަފާތު ޝުއޫރުތަކެއް ކަމަށާއި، ރަށްރަށުގައި މަޝްރޫއުތައް ނުހިންގާކަމުގެ ޝަކުވާތައް ރައްޔިތުން ކުރަމުންދާކަމަށް އަބްދުއްރަހީމް ވިދާޅުވި އެވެ. 

އެ ވާހަކައާއި ގުޅުވާ އަބްދުއްރަހީމް ވިދާޅުވީ ފަސް އަހަރުގެ ވެރިކަމެއް ނިމިގެންދާއިރު ރަށްރަށުގައި މަޝްރޫއުތައް ނުހިނގާކަން ވެސް ރައީސް ޞާލިހަށް އެނގިވަޑައިނުގަންނަވާ ކަމަށެވެ. އަދި އެމަނިކުފާނަށް ކުޑަމިނުން ކަންކަން ނޭނގޭކަން ވެސް އެނގިވަޑައި ނުގަންނަވާ ކަމަށެވެ. 

އެއީ ހިތާމަކުރައްވާ ކަމެއް ކަމަށާއި، ގައުމު މިހާރު މި އޮތީ ވާނުވާގައި ހުންނަވާ ބޭފުޅަކާއި ހަވާލުކުރާ ހިސާބަށްވުރެ މާ ނާޒުކު ހާލަތެއްގައި ކަމަށް އަބްދުއްރަހީމް ވިދާޅުވި އެވެ. 

އެކަން ފާހަގަކުރައްވާ އަބްދުއްރަހީމް ވިދާޅުވީ މިހާރު ގައުމުގެ ހާލަތަށް ބަލާއިރު، ވެރިކަން ހަވާލުކުރުމަށް ރައްޔިތުންނަށް އޮތް އެންމެ ރަނގަޅު ޗޮއިސްއަކީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުކަމަށެވެ. 

އެހެންކަމުން މި ފުރުސަތުގެ ބޭނުން ހިއްޕަވާ މި ރިޔާސީ އިންތިޚާބު އެއްބުރުން ޑރ މުއިއްޒަށް ކާމިޔާބުކޮށްދީ "ދިވެހީންގެ ރާއްޖެ" ދިވެހީންނަށް އަނބުރާ ހޯދުމުގެ މަސައްކަތް އެމަނިކުފާނާއި ހަވާލުކުރުމަށް އަބްދުއްރަހީމް ވަނީ ރައްޔިތުންގެ ކިބައިން އެދިވަޑައިގެންފަ އެވެ.