ވެރިކަން ލިބިވަޑައިގެންފި ނަމަ ރާއްޖޭގައި މިވަގުތު އެންމެ ބޮޑު އެއްމައްސަލަ ކަމުގައިވާ ނަފްސާނީ ދުޅަހެޔޮކަމުގެ މައްސަލަތައް ހައްލުކުރުނުގެ ގޮތުން، ނަފްސާނީ ބަލިތަކަށް ފަރުވާ ދިނުމަށް ހާއްސަކޮށްގެން ބައިނަލްއަގުވާމީ ފެންވަރުގެ ހޮސްޕިޓަލެއް ގާއިމްކުރާނެ ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ށ ފުނަދޫގައި ރޭ ޕީޕީއެމް/ޕީއެންސީގެ ފަރާތުން ބޭއްވި އެޕާޓީގެ ރިޔާސީ ކެންޑިޑޭޓް މުހައްމަދު މުއިއްޒުގެ ކެމްޕެއިން ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ނަފްސާނީ ދުޅަހެޔޮކަމަށް އެކަށީގެންވާ ފަރުވާ ނުލިބެނީ، ސިއްހީ ނިޒާމްގައި ވެސް ހުރި މައްސަލަތަކުގެ ސަބަބުން ކަމަށާއި އެކަމަށް ހާއްސަ ހޮސްޕިޓަލެއް މުހިންމުކަމަށެވެ. 

އެގޮތުން މި ކަންކަމަށް ހައްލު ގެނައުމުގެ ގޮތުން މެންޓަލް ހެލްތަށް ހާއްސަކުރެވިގެން، ބައިނަލްއަގުވަމީ މިންގަނޑުތަކަށް ފެތޭ، ޒަމާނީ ފެންވަރުގެ މެންޓަލް ހެލްތު ހޮސްޕިޓަލެއް ރާއްޖޭގައި ގާއިމްކޮށްދެއްވާނެ ކަމުގައި ޑރ މުއިއްޒު ވަނީ ވިދާޅުވެފައެވެ. 

އެ ޖަލްސާގައި އިތުރަށް ވާހަކަ ދައްކަވަމުން މުއިއްޒު ވިދާޅުވި ގޮތުގައި، ނަފްސާނީ މައްސަލަތަކުގެ އެންމެ ބޮޑު އެއް ސަބަބަކީ ރަނގަޅު ބޯހިޔާވަހިކަމެއް ރައްޔިތުންނަށް ނުލިބުމެވެ. ބޯހިޔާވަހިކަމުގެ މައްސަލަ ހައްލުވުމާ އެކު އެއާ ގުޅިފައިވާ އިޖުތިމާއީ އެހެން މައްސަލަތައް ހައްލުވުމަށް ވަރަށް ބޮޑު ބާރަކަށް ވާނެކަން އޭނާ ފާހަގަކުރެއްވިއެވެ.

މީގެ އިތުރުން އެ ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ދައުލަތުގެ ބެލުމުގެ ދަށުން ބަލަހައްޓަމުން އަންނަ ކުދިންނަށް އާއިލާއެއް ފޯރުކޮށްދިނުމުގެ ޕްރޮގްރާމެއް މުއިއްޒުގެ ވެރިކަމުގައި ހިންގަވާނެކަމުގައެވެ.

އެ ނިޒާމް ވަރުގަދަކުރަން ޖެހޭ ކަމަށް ގަބޫލުކުރައްވާ ކަމަށާއި، ނަމަވެސް އެފަދަ މަރުކަޒެއްގައި އެ ކުދިން ބޭއްތިބުމަކީ ހައްގު މިންވަރު ނޫން ކަމަށް އޭނާ ވިދާޅުވިއެވެ.

މީގެ އިތުރުން މުއިއްޒު ވިދާޅުވީ މި މަޝްރުއުގެ ބޭނުމަކީ، އެ ކުދިން ބަލަހައްޓާނެ އާއިލާއެއް ކޮންމެ ކުއްޖަކަށް ހޯދައިދިނުން ކަމަށާއި އޭގެ ސަބަބުން، ގެއެއްގެ ތެރެއިން ބޮޑުވެގެން އަންނައިރު، އެ ކުދިންނަށް ލިބެން ޖެހޭ ލޯތްބާއި އަޅާލުން ލިބިގެން ދާނެ ކަމަށެވެ.