އިޚްލާސްތެރިކަމާއެކު ވެރިކަން ކުރެއްވި ނަމަ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ނިމެންދާއިރު، ވައުދުތައް ނުފުއްދައިގެން ރައްޔިތުން ޝަކުވާކުރަން ނުޖެހުނީސް ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ނ އަތޮޅަށް އެމަނިކުފާނު ކުރައްވާ ކެމްޕޭނު ދަތުރުފުޅުގައި ނ އަތޮޅު މަނަދޫއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

އެގޮތުން ޑރ މުއިއްޒު ވިދާޅުވީ މަނަދޫފަދަ އާބާދީއަކަށް، އަދި ސަރަހައްދުގައި ފާހަގަކޮށްލެވޭ މުހިންމު ރަށަކަށް ސަރުކާރުން ވަރަށް ބޮޑަށް އިހުމާުވެފައިވާކަން ފާހަގަކުރެވޭ ކަމަށެވެ.

އެގޮތުން މަނަދޫގައި އަސާސީ ގިނަ ޚިދުމަތްތަކެއް ފޯރުކޮށްނުދެވި ހުރުމުގެ ޝަކުވާތައް ރައްޔިތުން އުފުލަމުންދާކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ ރައްޔިތުންނަށް އެފަދައިން ޝަކުވާ ކުރަން ޖެހެނީ އިޚްލާސްތެރިކަމާއެކު ވެރިކަން ކޮށްދެވިފައި ނުވާތީ ކަމަށެވެ. 

އެކަން ފާހަގަކުރައްވާ ޑރ މުއިއްޒު ވަނީ މަނަދޫގެ ރައްޔިތުންނަށް ކޮށްދެއްވާނެ މުހިންމު ކަންކަން ހިއްސާކުރައްވާފަ އެވެ. އެގޮތުން މަނަދޫއަށް ކޮށްދެއްވާނެ ކަންކަމުގެ ގޮތުގައި ޑރ މުއިއްޒު ވިދާޅުވީ:

1. މަގުތައް ޒަމާނީ ފެންވަރަށް ތަރައްގީކުރުން 

2. ފެންވަރު ރަނގަޅު ނަރުދަމާގެ ނިޒާމެއް ގާއިމްކުރުން 

3. ހޮސްޕިޓަލުގެ ޚިދުމަތް ފުޅާކޮށް ހޮސްޕިޓަލު އަޕްގްރޭޑްކުރުން 

4. ބޯހިޔާވަހިކަމަށް ހައުސިން މަޝްރޫއެއް ހިންގުން 

5. ވޮލީ ކޯޓު އަދި ފުޓުބޯޅަ ދަނޑު އަޅައިދިނުން 

6. ގައުމީ ޔުނިވާސިޓީގެ ކެމްޕަހެއް އެޅުން 

ޑރ މުއިއްޒު އިތުރަށް ވިދާޅުވީ މަނަދޫއަށް ޚާއްސަކޮށްގެން ހިންގާ ތަރައްގީގެ ޕްރޮޖެކްޓުތަކުގެ އިތުރުން، ރާއްޖޭގެ ތަރައްގީއަށް ޕްރޮގްރެސިވް ކޮންގްރެސް ކޯލިޝަނުން އެކުލަވާލާފައިވާ ސިޔާސަތުގެ ތެރެއިން ވެސް މަނަދޫގެ ރައްޔިތުންނަށް ބޮޑެތި ފައިދާތަކެއް ލިބިގެންދާނެ ކަމަށެވެ. އަދި އެ ސިޔާސަތުތައް ތަންފީޒުކުރައްވާނީ ތަފާތު ކުރުމެއް ނެތި ހުރިހާ ރައްޔިތުންނަށް ވެސް މަންފާ ލިބިގެންދާނެ ގޮތަށް ކަމަށެވެ. 

އެހެންކަމުން، ރައްޔިތުން އެމަނިކުފާނަށް އިތުބާރު ކުރައްވާ އެއްބުރުން މި އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށްދިނުމަށް، މަނަދޫގެ މެޖޯރިޓީ އެ ކޯލިޝަނަށް ހޯއްދަވާދެއްވުމަށް ޑރ މުއިއްޒު ވަނީ އެދިވަޑައިގެންފަ އެވެ.