ރިޔާސީ އިންތިޚާބުގައި ވާދަކުރައްވަން ނިކުމެ ވަޑައިގެން ހުންނެވި ނަމަވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބަލި ޤަބޫލުކުރައްވައިފި ކަމަށާއި، ދެން އެންމެ ރަނގަޅުވާނީ އިންތިޚާބުން ނަންފުޅު އަނބުރާ ނެންެވުންކަމަށް ޕްރޮގްރެސިވް ކޮންގްރެސް ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައި ވަނީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓުގެ ގޮތުގައި ރައީސް އަބްދުالله ޔާމީން އަބްދުލްގައްޔޫމު އެންޑޯސްކުރެއްވި ރިޔާސީ ކެންޑިޑޭޓު ޑރ މުހައްމަދު މުއިއްޒު ނ އަތޮޅަށް ކުރައްވާ ރިޔާސީ ކެންޕޭނު ދަތުރުފުޅުގައި ނ ހޮޅުދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
އެގޮތުން އަބްދުއްރަހީމް ވިދާޅުވީ ދެން ސަރުކާރާއި ހަވާލުވާން ތިބި މީހުން އިންޑިއާ ސިފައިންގެ ވާހަކަ ނުދެއްކުމަށް ރައީސް ޞާލިހު ވިދާޅުވެފައިވާ ކަމަށާއި، އެ މޭރުމުން އެ ވާހަކަދެއްކުމަކީ ޚުދު އެމަނިކުފާނަށް މި އިންތިޚާބު ކާމިޔާބު ނުކުރެވޭނެކަން ކަށަވަރުކުރެވޭތީ ބަލި ގަބޫލުކުރުން ކަމަށެވެ.
"ދެންމެ ނޫސް ބަލާލިއިރު ވަރަށް އުފާވެރި ޚަބަރެއް ފެނުނު. އިބްރާހިމް މުހައްމަދު ޞާލިހު ވިދާޅުވަނީ މާދަމާ ވެރިކަމާއި ހަވާލުވާން ތިބި ބަޔަކު ކީއްކުރަންތޯ އިންޑިއާ ސިފައިންގެ ވާހަކަ ދައްކަނީ؟ އެހެންވީމަ ފުރަތަމަ ފަހަރަށް އިބްރާހިމް މުހައްމަދު ޞާލިހު އެއްބަސްވެވަޑައިގެންފި ރިޔާސީ އިންތިޚާބު ކާމިޔާބުކުރައްވާނީ ޕީޕީއެމް ޕީއެންސީން ކަމަށް"
ޕީއެންސީގެ ރައީސް އަބްދުއްރަހީމް އަބްދުالله
އަބްދުއްރަހީމް ވިދާޅުވީ ކޮންމެ އަހަރެއްގެ ރިޔާސީ އިންތިޚާބާއި ދިމާކޮށް ބާއްވާ ރިޔާސީ ބަހުސުގައި ވެސް އިބްރާހިމް މުހައްމަދު ޞާލިހަށް ބައިވެރިވެވަޑައިގަންނަވަން ކެރިވަޑައިނުގެން އުޅުއްވާކަމަށެވެ. އަދި އެ ބަހުސުގައި ޑރ މުއިއްޒާއި ބަހުސްކޮށްލަން ކެރިވަޑައިނުގެން އުޅުއްވަނީ އިންތިޚާބުން ބަލި ގަބޫލުފުޅު ކުރައްވައިގެން ހުންނަވާތީ ކަމަށާއި، ބަލި ގަބޫލުކުރައްވާއިރު ދެން އެންމެ ރަނގަޅުވާނީ އިންތިޚާބުން ނަންފުޅު އަނބުރާ ގެންދެވުންކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް ހޮޅުދޫ ޖަލްސާގައި ވާހަކަދައްކަވަނީ
"އަމިއްލަފުޅަށް ބަލި ގަބޫލުކުރެއްވިއްޔާ އެންމެ ރަނގަޅުވާނީ އަސްލު އިންތިޚާބުން ނަން އަނބުރާ ގެންދެވުން"
ޕީއެންސީގެ ރައީސް އަބްދުއްރަހީމް އަބްދުالله
އަބްދުއްރަހީމް ވިދާޅުވީ ދިވެހީން ތިބީ ދިވެހިރާއްޖޭގެ މިނިވަންކަން ނަގާލާ، މިތަނުގައި އިންޑިއާ ސިފައިން ތިބުމަށް ޖާގަދިން މީހުންނަށް ވެރިކަމުގެ ދެވަނަ ދައުރެއް ދޭ ގޮތަށް ނޫންކަން ރައީސް ޞާލިހަށް ވެސް ރަނގަޅަށް އެނގިވަޑައިގަންނަވާ ކަމަށެވެ. ރައީސް ޞާލިހު އުންމީދުކޮށްގެން ހުންނެވީ ރައީސް ޔާމިނަށް އިންތިޚާބުގައި ވާދަކުރުމުގެ ފުރުސަތު ނަގާލެއްވުމުން ފަސޭހައިން އިންތިޚާބު ކާމިޔާބު ކުރެވިދާނެކަމަށް ކަމަށެވެ.
އެހެން ނަމަވެސް ރައީސް ޔާމިނަށް ވާދަކުރުމުގެ ފުރުސަތު ގެއްލުވާލި ހިސާބުން އެމަނިކުފާނު ރިޔާސީ އިންތިޚާބުގައި އިދިކޮޅު ކޯލިޝަން ތަމްސީލު ކުރައްވާނެ ކެންޑިޑޭޓެއް ދެއްކި ހިސާބުން ރައީސް ޞާލިހު މިހާރު ހުންނެވީ ވަރަށް ބޮޑަށް ޖެހިލުންވެފައިކަމަށް އަބްދުއްރަހީމް ވިދާޅުވި އެވެ. އެއާއެކު އަބްދުއްރަހީމް ވަނީ މި އިންތިޚާބުން ރައީސް ޞާލިހު ލަދުފުޅުގަންނަ ވަރުގެ ބޮޑު ތަފާތަކުން ބަލިކުރުމަށް ރައްޔިތުން ވަރުގަދައަށް ކެމްޕޭނު ކުރެއްވުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
