މަސްތުވާތަކެތީގެ މައްސަލަ ޙައްލުކުރުމަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކުރާނެ މަސައްކަތްތަކުގެ ތެރެއިން ނ ވެލިދޫގައި ޑްރަގް ރިހިބިލިޓޭޝަން ސެންޓަރެއް އަޅުއްވާނެކަމަށް، އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު އެފަދައިން ވިދާޅުވެފައިވަނީ ނ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި ނ ވެލިދޫއަށް ވަޑައިގެން އެ ރަށުގައި ބޭއްވި ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ މަސްތުވާތަކެތީގެ މައްސަލައަކީ ހައްލުކުރަން ޖެހިފައި އޮތް އެހެން ނަމަވެސް އެކި ސަބަބުތަކާއި ހުރެ މިހާތަނަށް ހައްލު ނުވެ އޮތް ބޮޑު މައްސަލައެއް ކަމަށެވެ.
އެހެން ނަމަވެސް އެ މައްސަލައަކީ އިންތިޚާބަކާއި ދިމާކޮަށް ޕޯޑިއަމެއްގައި ދައްކާ ވާހަކައަކުން އެކަނި ޙައްލުކުރެވޭ ވަރަށް ވުރެ ބޮޑު މައްސަލައެއްކަމަށް ޑރ މުއިއްޒު ވިދާޅުވި އެވެ. އަދި އެއީ ސަރުކާރަކަށް އެކަނި ހައްލުކުރެވޭ ވަރަށްވުރެ ބޮޑު މައްސަލައެއްކަން ވެސް އެމަނިކުފާނު ފާހަގަކުރެއްވި އެވެ.
އެއާއެކު ޑރ މުއިއްޒު ވިދާޅުވީ ރައްޔިތުންގެ އެއްބާރުލުމާއި، އެހީތެރިކަމާއެކު ރާއްޖެއަށް ދިމާވެފައިވާ މަސްތުވާތަކެތީގެ މައްސަލަ ޙައްލުކުރުމުގެ މަސައްކަތް ކުރާއިރު، ސަރުކާރަށް ކުރެވޭނެ ވަރަށް ގިނަ މަސައްކަތްތައް ހުރިކަމަށް ޤަބޫލުކުރައްވާ ކަމަށެވެ.
އެގޮތުން ޑްރަގުގެ ވަބާގައި ޖެހިފައިވާ ކުދިން އަނބުރާ މުޖުތަމައަށް ގެނައުމަށްޓަކައި މިހާރު ގާއިމްކުރެވިފައިވާ ރިހިބިލިޓޭޝަން ސެންޓަރުތަކުގެ ފެންވަރު ރަނގަޅުކުރެވި ރާއްޖޭގެ އެކި ކަންކޮޅުތަކުގައި ޒަމާނީ ޓެކްނޮލޮޖީއާއި ވަސީލަތްތަކާއެކު ފަރުވާދޭނެ ސެންޓަރުތަކެއް ޤާއިމްކުރުން މުހިންމުކަމަށް ޑރ މުއިއްޒު ވިދާޅުވި އެވެ.
އެމަނިކުފާނު ވިދާޅުވީ ރާއްޖޭގެ އކި ސަރަހައްދުތަކުގައި އެފަދަ ސެންޓަރުތައް އަޅުއްވާދެއްވާނެ ކަމަށެވެ. އަދި ނ ވެލިދޫއަކީ ވެސް ރިހިބިލިޓޭޝަން ސެންޓަރު އަޅާނެ ރަށެއްގެ ގޮތުގައި ހައްދަވާނެކަމަށެވެ.
"އެކި ސަރަހައްދުތަކުގައި ޑްރަގް ރިހިބިލިޓޭޝަން ސެންޓަރުތަކެއް ގާއިމްކުރާނަން. އެގޮތުން ވެލިދޫއަކީ ވެސް އެފަދަ ރިހިބިލިޓޭޝަން ސެންޓަރެއް އަޅާނެ ރަށެއްކަމުގައި ކަނޑައަޅާނަން"
ޑރ މުހައްމަދު މުއިއްޒު
ޑރ މުއިއްޒު ވިދާޅުވީ މަސްތުވާތަކެތީގެ ވަބާގައި ޖެހިފައި ތިބި ޒުވާނުންނަކީ ކުށްވެރިންކަމަށް ނިންމާ ބާކީ ކުރުމުގެ ބަދަލުގައި މަަސައްކަތްޕުޅު ކުރައްވާނީ އެމީހުން އަނބުރާ މުޖުތަމައަށް ގެނެސް، އެމީހުންނަކީ ވެސް ބޭނުންހިފޭ ބަޔަކަށް ހެއްދެވުމަށް ކަމަށެވެ.
ފެންވަރު ރަނގަޅު ފަރުވާގެ ނިޒާމުގެ ތެރެއިން މަސްތުވާތަކެތީގެ ވަބާގައި ޖެހިފައި ތިބި ޒުވާނުން އަނބުރާ މުޖުތަމައަށް ގެނެސް، ޑްރަގުގެ މައްސަލައަށް ޙައްލުތަކެއް ހޯއްދަވާދެވިދާނެ ކަމަށް ޤަބޫލުކުރެވޭކަމަށް ޑރ މުއިއްޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
