އަދުލު އިންސާފުގެ ނިޒާމު ހަރުދަނާކުރުމަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ކަފާލާތުގެ ދަށުން ބަންދުން ދޫކޮށްލުމުގެ ޤާނޫނަކާއި، ނުހައްގުން ޖަލުގައި ބަންދުކުރާ މީހުންނަށް ލިބޭ ގެއްލުމުގެ ބަދަލު ދެވޭނެ ގާނޫނެއް އެކުލަވާލާނެ ކަމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ނ ވެލިދޫގައި އޮތް ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން އެމަނިކުފާނު ވަނީ ޝަރުއީ ދާއިރާ އިސްލާހުކުރުމަށް ކުރައްވާނެ ބައެއް ކަންކަމަށް އަލިއަޅުވާލައްވާފަ އެވެ. 

އެގޮތުން އެމަނިކުފާނު ވިދާޅުވީ ކަފާލާތުގެ ފުރިހަމަ ޤާނޫނެއް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި އެކުލަވާލާނެކަމަށެވެ. ކަފާލާތަކީ ދުނިޔޭގެ ތަހުޒީބު ގައުމުތަކުގައި ވެސް އަމަލުކުރާ އުސޫލެއް ކަމަށާއި، ކުށުގެ ތުހުމަތުކުރެވޭ މަރުހަލާގަޔާއި، އިސްތިއުނާފު މަރުހަލާގައި ކަފާލާތު ލިބުމަކީ ހައްގެއްކަމަށާއި، އެއީ ދުނިޔޭގެ ޑިމޮކްރެޓިކް ގައުމުތަކުގައި ވެސް އަމަލުކުރާ އުސޫލުކަން ޑރ މުއިއްޒު ފާހަގަކުރެއްވި އެވެ. 

Advertisement

އެކަން ފާހަގަކުރައްވާ ޑރ މުއިއްޒު ވިދާޅުވީ ކަފާލާތުގެ ފުރިހަމަ ޤާނޫނެއް އެކުލަވާލައްވާނެ ކަމަށެވެ. 

ޑރ މުއިއްޒުގެ ރިޔާސީ މެނިފެސްޓޯގައި ޝަރުއީ ދާއިރާއާއި ގުޅުންހުރި ބާބުގައި ވަނީ ކަފާލާތު ގާނޫނަށް ތަފްސީލީ ގޮތެއްގައި އަލިއަޅުވާލައްވާފަ އެވެ. 

އޭގެ އިތުރުން ވާނުވާ ބަންދު ނިމުމަކަށް ގެނެސް ނުހައްގުން ބަންދުކުރާ މީހުންނަށް ލިބޭ ގެއްލުމުގެ ބަދަލު ދެވޭނެ ގާނޫނެއް އެކުލަވާލުމަށް ވެސް މެނިފެސްޓޯގައި ހިމަނާފައި ވެއެވެ. މެނިފެސްޓޯގައި ބަޔާންކޮށްފައިވާ ގޮތުން ލަސްވެގެން 48 ގަޑިއިރުގެ ތެރޭގައި ދައުވާކުރެވޭ ގޮތަށް ފުލުހުންގެ މަސައްކަތް އިންތިޒާމުކުރުމަށް ގާނޫނުގައި ހިމަނާނެއެވެ. 

ހަމައެއާއެކު ޝަރުއީ ދާއިރާ ހަރުދަނާކުރުމަށް ކޯޓުތަކުގެ ނިޒާމަށް ބަދަލުތަކެއް ގެނެސް، ކޯޓުތަކުގެ ވަސީލަތްތައް މިހާރަށްވުރެ ހަރުދަނާކުރައްވާނެކަމަށް ޑރ މުއިއްޒު ވަނީ ވިދާޅުވެފަ އެވެ.