މަގުބޫލު އުޒުރެއް ނެތި، ތާއީދުކުރާ މީހެއްގެ ސަބަބުން ސަރުކާރުގެ ވަޒީފާއިން ވަކިކޮށްފިނަމަ، ޕީޕީއެމް/ ޕީއެންސީގެ ސަރުކާރެއްގައި އެ ފަރާތްތަކަށް އަލުން ވަޒީފާ ދެއްވާނެ ކަމުގައި އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
ޑރ މުއިއްޒު މިފަދައިން ވިދާޅުވީ ރިޔާސީ ކެމްޕެއިންގައި ނ އަތޮޅު ވެލިދުއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ރޭ ބޭއްވި ޖަލްސާގައި ވާހަކަ ދައްކަވަމުންނެވެ.
މުއިއްޒުގެ ވާހަކަފުޅުގައި ފާހަގަކުރެއްވި ގޮތުގައި އިދިކޮޅުން ކެމްޕެއިންއަށް އަންނަ ފަރާތްތަކާއި ސަލާމްކޮށް ކަންވެސް ބައެއްް ރައްޔިތުން ތިބެނީ ބިރުންކަމަާއި އެއީ ވަޒީފާގެ ބިރުގެ ސަބަބުން ހިނގާ ކަންކަންކަމުގައި ވިދާޅުވެ، ޕީޕީއެމް/ޕީއެންސީގެ ސަރުކާރެއްގައި ވަޒީފާގެ ބިރުވެރިކަން އެއްކޮށް ނައްތަވާލާނެ ކަމުގައި ވިދާޅުވެފައެވެ.
ވަޒީފާއިން ވަކިކޮށްފިއްޔާ އަޅުގަނޑުމެން އައިސް އަނބުރާ ލައިދޭނަމޭ (ވަޒީފާއަށް), އެއަށްވުރެ ރަނގަޅަށްވެސް އެކަން ކޮށްދޭނަމޭ،
ޑރ މުހައްމަދު މުއިއްޒު
މީގެ އިތުރުން މުއިއްޒު ވިދާޅުވީ، ޕީޕީއެމް/ޕީއެންސީގެ ސަރުކާރެއްގައި ވަޒީފާގެ ފުރުސަތުތައް ފަހިކޮށްދޭނެ ކަމަށާއި، ވަޒީފާގެ ތަފާތުތައް ނައްތާލައި ހަމަހަމަ ގޮތެއްގައިއެކަން ތަނަވަސް ކޮށްދޭނެ ކަމަށެވެ.
މީގެ އިތުރުން ކުރިންވެސް އެ ބޭފުޅާ ވިދާޅުވިފަދައިން ވަޒީފާ ނެތް ރައްޔިތަކު ނެތްވަރަށް ވަޒީފާގެ ފުރުސަތުތައް ފަހިކޮށްދޭނެކަމުގައި ވިދާޅުވި ވާހަކަ ތަކުރާރުކުރައްވައި އެ ޔަގީންކަން އަރުވައިފައެވެ.
Advertisement
This content is created and paid for by advertisers and does not involve Voice Journalists
