މިއަހަރުގެ ރިޔާސީ އިންތިހާބު ކާމިޔާބުވެ ވެރިކަމަށް ވަޑައިގަނެވިއްޖެނަމަ ބިދޭސީ މަސައްކަތްތެރިންގެ މިހާރު މަސައްކަތްކުރަމުންދާ ގިނަ ވަޒީފާތަކަކީ ހަމައެކަނި ދިވެހިންނަށް ހާއްސަ ވަޒީފާތަކަށް ކަމުގައި ހައްދަވައި ދެއްވާނެ ކަމުގައި، ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ނ ވެލިދޫގައި ރޭ ކުރިއަށް ގެންދިޔަ ޑރ މުހައްމަދު މުއިއްޒުގެ ރިޔާސީ އިންތިހާބުގެ ކެމްޕެއިންގައި ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ، ދިވެހި ޒުވާނުން ވަޒިފާއަށް ދިއުމަށް ބަލާއިރު ގިނަ ވަޒީފާތަކުގައި ތިބެނީ ބިދޭސީ މަސައްކަތްތެރިން ކަމަށެވެެ. މިސާލެއްގެ ގޮތުން ފަތުރުވެރިކަމުގެ ދާއިރާގެ ވަޒީފާތަކަށް އިޝާރާތްކުރައްވައި މުއިއްޒު ވިދާޅުވީ، މި ދާއިރާގެ އިތުރުންވެސް ދިވެހިން ވަޒީފާ އަދާކުރާ ހިތްވާ ވަޒީފާތައް ހިމެނޭ އިތުރު ދާއިރާތަކުގައިވެސް ބިދޭސީން މަސައްކަތް ކުރަމުން އަންނަ ކަމުގައެވެ. 

އޭގެ ތެރޭގައި ހެއާ އެންޑް ބިއުޓީ، ރިސޯޓުތަކުގެ މިއުޒިޝަންސް، ބޭންޑްތައް، ކަސްޓަމާ ސާވިސް، ހައުސް ކީޕިން، ފްރަންޓް އޮފީސް، ހިއުމަން ރިސޯސް ޑިޕާޓްމަންޓް މުއިއްޒު ފާހަގަ ކުރެއްވިއެވެ. އަދި މާލެ އަށް ބަލާއިރު، ޓެކްސީ ދުއްވުމުގައި ވެސް ބިދޭސީން މަސައްކަތް ކުރާ ކަމަށް މުއިއްޒު ވިދާޅުވިއެވެ.

Advertisement

މީގެ އިތުރުންވެސް ރޭގެ ޖަލްސާގައި މުއިއްޒު ވިދާޅުވީ މަހުން އުފައްދާ ބާވަތްތަކާއި ސީފުޑްގެ ބާވަތްތައް ފަސޭހަކަމާއެކުގައި ބޭރު ދުނިޔޭގެ މާކެޓުގައި އާއި ލޯކަލް މާރުކޭޓުގައި އާއި ފަތުރުވެރިކަމުގެ އިންޑަސްޓްރީގައި ވިއްކުމަށް ވަރަށް ގިނަ ބަޔަކު ބޭނުންވެފައި ތިބި ކަމަށެވެ. އެހެންކަމުން މިކަމަށް މަގުފަހިކޮށްދިނުމަށަށްސަރުކާރުން އެހީތެރިވެދީގެން ރަސްމީކޮށް އޮންލައިން ޕްލެޓްފޯމެއް ގާއިމުކޮށް ދެއްވާނެ ކަމަށް ވެސް މުއިއްޒު ވައުދުވެވަޑައިގެންނެވިއެވެ.