ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން، ޕީޕީއެމް/ޕީއެންސީގެ ފަރާތުން ވާދަކުރައްވާ ކެންޑިޑޭޓް، ޑރ. މުހައްމަދު މުޢިއްޒަށް ތާއީދު ކުރައްވަން ރައްޔިތުންގެ މަކުނުދޫ ދާއިރާގެ ކުރީގެ މެންބަރު، ޑރ. އަނާރާ ނަޢީމް ނިންމަވައިފިއެވެ. 

މިކަން ހާމަކުރައްވައި އަނާރާ ކުރެއްވި ޓުވީޓެއްގައި ވަނީ މުޢިއްޒަށް ތާއީދު ކުރައްވާ ސަބަބުތައްވެސް ހާމަ ކުރައްވާފައެވެ. 

އެގޮތުން އަނާރާ ވިދާޅުވީ، ދިވެހީންނަށްފަހި ހަރުދަނާ ޚާރިޖީ ސިޔާސަތެއް ގެންގުޅުއްވާނެ ކަމަށާއި އިސްލާމްދީނުގެ އުޞޫލުތަކަށް ރިޢާޔަތްކުރައްވާނެ ކަމަށާއި އަދި އަންހެނުންނަށް ހަމަހަމަ ފުރުސަތުތައް ފަހިކޮށްދެއްވާނެކަމުގެ ޔަޤީންކަން މުޢިއްޒު ދެއްވާފައިވާ ކަމަށެވެ.

Advertisement

"އެންމެންގެ ވޯޓު ކެންޑިޑޭޓް ނަންބަރ 4 އަށް" މުޢިއްޒަށް ވީޓު ދެއްވުމަށް އިލްތިމާސްކުރައްވަައި އަނާރާ ވިދާޅުވި އެވެ. 

ސަރުކާރުގެ ކޯލިޝަންގައި ހިމެނޭ އަދާލަތު ޕާޓީން ސިޔާސީ މައިދާނަށް ނުކުމެވަޑައިގަތް އަނާރާ 2021 ވަނަ އަހަރުގެ ޑިސެމްބަރ މަހުގެ ފަހުކޮޅާއި ޖެހެންދެންވެސް ހުންނެވީ އެ ޕާޓީގެ މެންބަރެއްގެ ގޮތުގައެވެ. 

މަޖިލީހުގެ މަކުނުދޫ ދާއިރާގެ ގޮނޑި ކާމިޔާބު ކުރެއްވީވެސް އަދާލަތު ޕާޓީގެ ޓިކެޓުގައެވެ. އަދާލަތު ޕާޓީން ވަކިވިއިރު ހުންނެވީ އެ ޕާޓީގެ އިލްމެވެރިންގެ މަޖިލީހުގައެވެ.

އެ ޕާޓީން ވަކިވެވަޑައިގެންނެވީ އެއްވެސް ސިޔާސީ ޕާޓީއެއްގައި ހުންނަވަން ބޭނުން ނުވާތީ ކަމަށް މީގެ ކުރިން އަނާރާ ވަނީ ވިދާޅުވެފަ އެވެ.