ވެރިކަން ލިބިވަޑައިގެންފި ނަމަ ފުވައްމުލަކު ސިޓީގައި ޒަމާނީ ފެންވަރުގެ ބޮޑު ބަނދަރެއް ތަރައްގީކޮށްދޭނެކަމުގެ ޔަގީންކަން ދެއްވާކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ފުވައްމުލަކު ސިޓީއަށް އެމަނިކުފާނު ކުރެއްވި ރިޔާސީ ކެމްޕޭނު ދަތުރުފުޅުގައި ބޭއްވި ޖަލްސާއެއްގައި އެ ސިޓީގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

އެގޮތުން އެމަނިކުފާނު ވިދާޅުވީ ފުވައްމުލަކު ސިޓީގައި ފަތުރުވެރިކަމުގެ ސިނާއަތު އަދި މަސްވެރިކަމުގެ ސިނާއަތު މިހާރަށްވިރެ ފުޅާކުރުމަށް ފުވައްމުލަކު ސިޓީގައި މިހާރު އޮތް ބަނދަރު ބޮޑުކުރުމަކީ މުހިންމު ކަމެއްކަމަށް ދެކިވަޑައިގަންނަވާ ކަމަށެވެ. އަދި އެއީ ރައްޔިތުން އެދޭ ވަރަށް ބޮޑު އެދުމެއްކަމަށް ޑރ މުއިއްޒު ވިދާޅުވި އެވެ. 

އެއާއެކު އެމަނިކުފާނު ވިދާޅުވީ ރައްޔިތުން އެދޭގޮތަށް ފުވައްމުލަކު ސިޓީގައި ޒަމާނީ ފެންވަރުގެ ބޮޑު ބަނދަރެއް ތަރައްގީކޮށްދެއްވާނެ ކަމުގެ ޔަގީންކަން ދެއްވާކަމަށެވެ. 

ޑރ މުއިއްޒު ވިދާޅުވީ އެމަނިކުފާނު ރައްޔިތުންނަށް ހުސް ވައުދުވެވަޑައި ނުގަންނަވާ ކަމަށެވެ. އަދި ވޯޓު ހޯދުމުގެ ނިޔަތުގައި ވެސް ވައުދުވެވަޑައި ނުގަންނަވާ ކަމަށެވެ. 

ވައުދެއް ވެވަޑައިގެންފި ނަމަ އެއީ އަމާނާތެއްކަމަށް ގަބޫލުކުރައްވާކަމަށާއި، އެ ވައުދަށް ޖަވާބުދާރީވެ ވަޑައިގަންނަވަން ޖެހޭނެކަމަށް ގަބޫލުކުރައްވާކަމަށް ޑރ މުއިއްޒު ވިދާޅުވި އެވެ. 

އެއާއެކު އެމަނިކުފާނު ވިދާޅުވީ ފުވައްމުލަކު ރައްޔިތުންނަށް ވެސް އަދި ރާއްޖޭގެ އެހެން ކަންކޮޅުތަކުގައި ދިރިއުޅުއްވާ ރައްޔިތުންނަށް ވެސް ވެވަޑައިގަންނަވާ ވައުދު ފުއްދަވާދެއްވާނެކަމުގެ ޔަގީންކަން ދެއްވާކަމަށެވެ. އަދި އެމަނިކުފާނަށް އިތުބާރުކޮށް ރައްޔިތުންނަށް ޚިދުމަތް ކުރުމުގެ ފުރުސަތު ދެއްވުމަށް ޑރ މުއިއްޒު ވަނީ އެދިވަޑައިގެންފަ އެވެ.