ފުވައްމުލަކު ސިޓީ "ތައުލީމީ ހަބެއް" ގެ ގޮތުގައި ތަރައްގީ ކުރާނެކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ. 

ފުވައްމުލަކު ސިޓީގައި ހޮނިހިރު ދުވަހުގެރޭ ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ޑރ މުއިއްޒު އެމަނިކުފާނުގެ ވެރިކަމުގައި އެ ސިޓީއަށް ކޮށްދެއްވާނެ ބައެއް ކަންކަން ހިއްސާކުރައްވާފަ އެވެ. 

އެގޮތުން އެމަނިކުފާނު ވިދާޅުވީ ފުވައްމުލަކު ސިޓީއަކީ ތައުލީމަށް ލޯބިކުރާ ރައްޔިތުންތަކެއް އުޅޭ ސިޓީއެއް ކަމަށެވެ. އަދި ޒަމާނުއްސުރެ ތައުލީމު ހާސިލްކުރުމަށް އެކި ކަންކޮޅުތަކުން ދަރިވަރުން ދާ ރަށެއް ކަމަށެވެ. 

އެހެންކަމުން ފުވައްމުލަކު ސިޓީގައި ތައުލީމީ ނިޒާމު ހަރުދަނާކުރުމަކީ މުހިންމު ކަމެއްކަމަށް ދެކިވަޑައިގަންނަވާ ކަމަށާއި، އެ ސިޓީ ތަރައްގީކުރާނީ "ތައުލީމީ ހަބެއް" ގެ ގޮތުގައި ކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ ތައުލީމީ ނިޒާމު ހަރުދަނާ ކުރާއިރު، ފުވައްމުލަކު ސިޓީގައި ތައުލީމު ހާސިލުކުރާ ދަރިވަރުންނަށް ޚާއްސަކޮށްގެން ފެންވަރު ރަނގަޅު އެކޮމޮޑޭޝަން ބްލޮކެއް އަޅުއްވާދެއްވާނެ ކަމަށެވެ. އޭގެ ސަބަބުން ދަރިވަރުންނަށް އެތައް ފަސޭހަތަކެއް ލިބިގެންދާނެކަމަށް ޑރ މުއިއްޒު ވިދާޅުވި އެވެ. 

އޭގެ އިތުރުން އެމަނިކުފާނު ވިދާޅުވީ ފުވައްމުލަކު ސިޓީގައި ޒަމާނީ ފެންވަރުގެ ލައިބްރަރީއެއް އަޅުއްވާދެއްވާނެ ކަމަށެވެ. އެފަދަ ލައިބްރަރީއެއް އެޅުމުގެ ބޭނުމަކީ ތައުލީމީ ދާއިރާ ފުޅާކޮށް، ދިރާސާކުރުމުގެ ދާއިރާއިން ކުރިއަށްދާން ބޭނުންވާ ދަރިވަރުންނަށް ފުރުސަތުތައް ފަހިކޮށްދިނުންކަމަށް ޑރ މުއިއްޒު ވިދާޅުވި އެވެ. 

އަދި ތައުލީމީ ހަބަކަށް ފުވައްމުލަކު ސިޓީ ހެދުމުގެ މަސައްކަތް ޕްރޮގްރެސިވް ކޮންގްރެސް ކޯލިޝަނުން ކުރާއިރު އެ ސިޓީއަށް ބޭނުން ޖެހިފައިވާ ގިނަ ކަންތައްތަކެއް އިންތިޒާމުކޮށްގެން ކުރިއަށް ގެންގޮސްދެއްވާނެ ކަމުގެ ޔަގީންކަން ޑރ މުއިއްޒު ވަނީ ދެއްވާފަ އެވެ.