ފުވައްމުލަކު ސިޓީ ތަރައްގީކުރުމަށް ކުރާނެ މަސައްކަތްތަކުގެ ތެރެއިން ފުވައްމުލަކު ސިޓީގެ އެއާޕޯޓާއި ހޮސްޕިޓަލު އަޕްގްރޭޑްކުރާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ. 

ފުވައްމުލަކު ސިޓީގައި ބޭއްވި ޚާއްސަ ޖަލްސާއެއްގައި ވާހަކަދައްކަވަމުން ޑރ މުއިއްޒު ވިދާޅުވީ ފުވައްމުލަކު ސިޓީއަކީ ރައީސް ޔާމީންގެ ވެރިކަމުގައި ވަރަށް ޚާއްސަ އިސްކަމެއް ދީގެން ތަރައްގީކުރަމުން އައި ރަށެއް ކަމަށެވެ.

އެގޮތުން އެ ރަށުގައި ތަރައްގީގެ ގިނަ މަޝްރޫއުތަކެއް ހިންގާފައިވާ ކަމަށާއި، ވެރިކަން ބަދަލުވި ހިސާބުން ފުވައްމުލަކުގެ ތަރައްގީ ފަހަތަށް ސޮއްސާލާފައިވާކަން ރައްޔިތުން ފާހަގަކުރަމުންދާ ކަމަށް ޑރ މުއިއްޒު ވިދާޅުވި އެވެ. 

އެކަން ފާހަގަކުރައްވާ ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ފުވައްމުލަކު ސިޓީގެ އެއާޕޯޓު ތަރައްގީކުރުމުގެ މަޝްރޫއެއް ހިންގަވާނެކަމަށެވެ. އަދި އެއީ ތަރުތީބުކޮށް އިންތިޒާމުކޮށްގެން ހިންގާ މަޝްރޫއަކަށް ހައްދަވާނެކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ އެއާޕޯޓުގެ އިތުރުން ފުވައްމުލަކު ސިޓީގައި ސިއްޙީ ނިޒާމު ހަރުދަނާކުރުމަށް ރަށުގެ ހޮސްޕިޓަލު ވެސް އަޕްގްރޭޑް ކުރައްވާނެ ކަމަށެވެ.

އެގޮތުން ރަށުގައި ތިބެގެން ސިއްހީ ޚިދުމަތް ލިބޭނެ ވަސީލަތްތައް އެ ހޮސްޕިޓަލުގައި ތަރައްގީކޮށްދެއްވާނެ ކަމަށާއި، އެކަމުގެ ސަބަބުން ފުވައްމުލަކުގެ ރައްޔިތުން ސިއްހީ ޚިދުމަތް ހޯދުމަށް ކުރަންޖެހޭ ދަތުރު ކުރަން ނުޖެހި ފަސޭހަކަމާއެކު އެ ޚިދުމަތް ލިބޭނެ އިންތިޒާމުތައް ހަމަޖެހިގެންދާނެ ކަމަށް ޑރ މުއިއްޒު ވިދާޅުވި އެވެ. 

އެ ކަންކަމުގެ އިތުރުން ވެސް ފުވައްމުލަކު ސިޓީއަށް ކޮށްދެއްވާނެ ބައެއް ކަންކަން ވެސް ޑރ މުއިއްޒު ވަނީ ހިއްސާކުރައްވާފައެވެ. އޭގެ ތެރޭގައި ހިމެނެނީ:

1. ފުވައްމުލަކުގައި ހުރި ސަރުކާރު އޮފީސް އިމާރާތްތައް އެއްފުރާޅެއްގެ ދަށަށް ގެނެސް ވަގުފު އިމާރާތެއް އެޅުން

2. ބަނދަރު ބޮޑުކުރުން

3. ސިޓީ ލައިބްރަރީ އަދި އެކޮމޮޑޭޝަން ބްލޮކު އެޅުން

4. ސިޓީ ހޮޅާ އެޅުން

5. އިންޑޯ ސްޕޯޓްސް ކޮމްޕްލެކްސް ގާއިމްކުރުން 

ޑރ މުއިއްޒު ވިދާޅުވީ ފުވައްމުލަކަށް ޚާއްސަ ކަންކަމުގެ އިތުރުން ސަރުކާރުގެ ބޯހިޔާވަހިކަމުގެ ސިޔާސަތާއި އެއްގޮތަށް ފުވައްމުލަކު ސިޓީގައި ވެސް ބޯހިޔާވަހިކަމުގެ މަޝްރޫއުތައް ކުރިއަށް ގެންގޮސްދޭނެ ކަމަށެވެ. އަދި ވަޒީފާގެ ޔަގީންކަން އެ ރަށުގެ ރައްޔިތުންނަށް ވެސް ދެއްވާ ކަމަށެވެ. 

ރައްޔިތުންގެ ތަރައްގީއަށް ޕްރޮގްރެސިވް ކޮންގްރެސް ކޯލިޝަނުން ގެންގުޅޭ ސިޔާސަތުތައް ތަންފީޒުކުރުމަށް އެ ކޯލިޝަނަށް ފުރުސަތުދެއްވުމަށް ހުރިހާ ރައްޔިތުން ވެސް ވިސްނުން އެއްގޮތް ކުރައްވާ މަސައްކަތްޕުޅު ކުރެއްވުމަށް ޑރ މުއިއްޒު ވަނީ އެދިވަޑައިގެންފަ އެވެ.