ދިވެހިރާއްޖޭގެ ދާޚިލީ ކަންކަމުގެ މައްޗަށް ބަސް ބިޔުމާއި، ރާއްޖޭގެ މައްޗަށް އެއްވެސް ބާރެއް ފޯރުވުމުގެ އެއްވެސް ހައްގެއް އެއްވެސް ގައުމަކަށް ނޯނާނެ ކަމަށާއި، އެއިން ގައުމެއްގެ ސިފައިން ރާއްޖޭގައި ތިބެގެން ނުވާނެކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިންގައި އިއްޔެ ފުވައްމުލަކަށް ވަޑައިގަތުމުން މުއިއްޒުއާއި ކެމްޕެއިން ޓީމަށް ފުވައްމުލަކުން ކީ ހޫނު މަރުހަބާއާއެކު، ރޭ އެރަށުގައި ބޭއްވި ބޮޑު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، އަންނަ މަހުގެ 9 ވަނަ ދުވަހުގައި ބާއްވާ ރިޔާސީ އިންތިހާބަކީ ރައްޔިތުންނަށް ގައުމުގެ ބަސް ބުނުމަށް ފުރުސަތު ލިބޭ އެންމެ ފަހު ފަހަރުކަމަށް ދެކި އިންތިހާބުގައި ދިޗެހި ކޮންމެ ރައްޔިތަކުވެސް ވޯޓުލުމަކީ މުހިންމު ކަމެއް ކަމަށެވެ.
އެގޮތުން ޕީޕީއެމް/ޕީއެންސީގެ ވެރިކަމެއްގައި ވަކި ގައުމަކަށް ދޭ ހާއްސަ ސަމާލުކަމެއް، ނޯންނާނެ ކަމަށާއި ވަކި ކޮޅަކަށް ބަރުވެފައިވާ ހާރިޖީ ސިޔާސަތު ގަބޫލު ނުކުރައްވާކަމުގައި ވިދާޅުވ މުއިއްޒުވަނީ ބޭރުގެ ކޮންމެ ގައުމަކާއި ވެސް ގުޅުން އޮންނާނީ ހަމަހަމަ އުސޫލުން ކަމަށާއި އެއީ ދިވެހި ގައުމުގެ ފުރިހަމަ މިނިވަންކަން ޔަގީންވާ ގޮތަށްކަމުގައިވެސް ވިދާޅުވެފައެވެ.
މީގެ އިތުރުން މުއިއްޒު ވިދާޅުވީ ރާއްޖޭގެ ހާލަތަށް އެއްވެސް ދެވަނަ ގައުމަކަށް ބަސް ބުނުމުގެ ހައްގެއް ނޯންނާނެކަމަށާއ އަދި ރާއްޖޭގައި އެއްވެސް ގައުމެއްގެ ސިފައިންނަށް ތިބުމުގެ ފުރުސަތެއް ވެސް ނެތްކަމަށް މުއިއްޒު ވިދާޅުވިއެވެ.
ސީރިއަސް ސިފައެއްގައި ގައުމާއި މެދު ވިސްނަން ޖެހޭ ކަމަށާއި ގައުމެއްގެ ވެރިކަން ހަވާލު ކުރަން ވާނީ ގައުމު ދެކެ ލޯބިވާ ގައުމާއި މެދު ވިސްނާ ބަޔަކަށްކަމަށް ވެސް ޑރ. މުއިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
