ޕްރޮގްރެސިވް ކޮންގްރެސް ކޯލިޝަންގެ ވެރިކަމެއް ވެގެންދާނީ އަރަބި އިސްލާމީ ގައުމުތަކާއި ގާތް ގުޅުމެއް ގާއިމުކޮށް، އެ ގައުމުތަކުގެ އެހީތެރިކަން އިންތިހާއަށް ރާއްޖެއަށް ލިބިގެންދާނެ ވެރިކަމަކަމަށް ކަމަށް ޕީޕީއެމްގެ އެޑްވައިޒަރު އަދި ކުރީގެ އިސްލާމިކް މިނިސްޓަރު ޑރ މުޙައްމަދު ޝަހީމު އަލީ ސައީދު ވިދާޅުވެއްޖެ އެވެ. 

ޑރ ޝަހީމު މިފަދައިން ވިދާޅުވެފައި ވަނީ ފުވައްމުލަކު ސިޓީގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން ޑރ ޝަހީމު ވަނީ ރައްޔިތުންނަށް މުހިންމު މެސެޖުތަކެއް ފޯރުކޮށްދެއްވާފަ އެވެ. އެގޮތުން އެމަނިކުފާނު ވިދާޅުވީ ރައީސް ޔާމީންގެ ވެރިކަން ނިމި، މި ފަސް އަހަރު ނިމެންދާއިރު، މިއަދު ގައުމުން އިވޭ އަޑަކީ ރައީސް ޔާމިނުގެ ވެރިކަން އިޔާދަކުރުމަށް ބޭނުންވެ ރައްޔިތުން އެމަނިކުފާނު މިނިވަންކުރުމަށް ގޮވާލާ އަޑުކަމަށެވެ. 

އެ ވެރިކަމުގައި ރައްޔިތުން ބޭނުންވާ ކަންތައްތަކެއް ކުރެވިގެން ދިޔައީ އިލްމީ ބޭބޭފުޅުން އިސް ސަފުގައި ތިއްބަވައިގެން ކުރި ބުރަ މަސައްކަތުންކަން ފާހަގަކުރައްވާ ޑރ ޝަހީމު ވިދާޅުވީ މި ރިޔާސީ އިންތިޚާބުގައި ޕީއެޗްޑީ ހާސިލްކުރައްވާފައިވާ ބޭފުޅަކު ރައީސް ޔާމިނު އެންޑޯސްކުރެއްވުމުން، ދެން "ޗުކުޗުކުލައްވަން" ނުޖެހޭނެ ކަމަށެވެ. އަދި އެންމެން ޚިޔާލު އެއްގޮތްކޮށް މަސައްކަތް ކުރަންވީ ގައުމީ ވެރިކަމެއް އުފެއްދުމަށް ކަމަށެވެ.

ވަކި ގައުމަކަށް ބަރޯސާވެފައި އޮތް އޮތުން ނިމުމަކަށް ގެނެސް، ރާއްޖޭގެ ދާޚިލީ ކަންކަމުގެ ތެރެއަށް އަވައްޓެރި ބައެއް ގައުމުތަކަށް ވަނުމުގެ ފުރުސަތު ނުދީ، އެ ޤައުމުތަކުން ކުރާ ކަންކަމަށް ފާޑުކިޔާނަމަ ރާއްޖެއަށް ކާބޯތަކެތި ލިބުމުގެ ދަތިކަން ކުރިމަތިވެދާނެކަމަށް ބައެއް ސިޔާސީ ފަރާތްތަކުން ދައްކަވަމުންދާ ވާހަކަތަކަށް ވެސް ޑރ ޝަހީމު ވަނީ ނުދީސާ ރައްދެއް ދެއްވާފަ އެވެ. 

އެގޮތުން އެމަނިކުފާނު ވިދާޅުވީ ދިވެހީން މަސައްކަތް ކުރައްވަންވީ ދިވެހީންގެ ވެރިކަމެއް ގާއިމްކުރުމަށް ކަމަށެވެ. އަދި އެ މަސައްކަތް ކުރާއިރު، ދިވެހީން ބަނޑަށް ނުޖެހޭނެ ކަމަށާއި، އަރަބި އިސްލާމީ ގައުމުތަކުގެ ފުރިހަމަ އެހީތެރިކަން ދިވެހީންނަށް ލިބިގެންދާނެކަން ޔަގީން ކުރެއްވުމަށް ވެސް ޑރ ޝަހީމު ވަނީ އެދިވަޑައިގެންފަ އެވެ. 

ފުވައްމުލަކު ޖަލްސާގައި ޑރ ޝަހީމު ވާހަކަދައްކަވަނީ

އެކަން ފާހަގަކުރައްވާ ޑރ ޝަހީމު ވިދާޅުވީ ދިވެހީންގެ ވެރިކަން ދިވެހީންނަށް އިޔާދަކޮށްދެއްވާނެ ބޭފުޅަކީ ޑރ މުހައްމަދު މުއިއްޒުކަމަށެވެ. އެމަނިކުފާނު އިސްލާމްދީނާއި މިނިވަންކަން "ކޮމްޕްރޮމައިސް" ނުކުރައްވާނެ ކަމަށާއި، އެމަނިކުފާ ގައުމިއްޔަތު ނަގަހައްޓަވާނެކަމުގެ ޔަގީންކަން ދެއްވާކަމަށް ޑރ ޝަހީމު ވިދާޅުވި އެވެ. 

މި ރިޔާސީ އިންތިޚާބަކީ ދިވެހީންގެ މިނިވަންކަމާއި ސިޔާދަތު ހިމާޔަތްކުރުމަށް ލިބޭނެ އެންމެ ފަހު ފުރުސަތުކަމަށާއި، އެހެންކަމުން ގައުމީ ފިކުރު އިސްކޮށް ދިވެހީންގެ ގައުމީ ވެރިކަމެއް މި ތަނުގައި އުފެއްދުމަށް ސިޔާސީ ޚިޔާލު ތަފާތުވުންތައް އެއްފަރާތްކޮށް ޑރ މުއިއްޒަށް ވޯޓުދެއްވުމަށް ޑރ ޝަހީމު ވަނީ އެދިވަޑައިގެންފަ އެވެ.