ޕީޕީއެމް ޕީއެންސީގެ ރިޔާސީ ކެންޑިޑޭޓާއި ޓީމަށް އިތުބާރު ކުރައްވާ ވެރިކަން ހަވާލުކޮށްދެއްވުމަށާއި ޔަގީނުންވެސް ނަތީޖާ ނެރެދޭނެ ކަމުގައި އެ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރިޔާސީ އިންތިހާބުގެ ކެމްޕެއިންގައި ގދ މަޑަވެއްޔަށް ވަޑައިގަތެން އެ ރަށުގެ ސަޕޯޓަރުންނާއި ބައްދަލުކުރައްވާ ދެއްކެވި ވާހަކަފުޅުގައި މުއިއްޒު ވިދާޅުވީ ކުރިއަށް މި އޮތް ސެޕްޓެމްބަރު 9 ވަނަ ދުވަހަކީ ދިވެހިން ކުރިއަށް ދާނީ ދިވެހިގެން ރާއްޖެއާއެކުތޯ ނުވަތަ ބައެއްގެ އަޅުވެތިކަމުގެ ދަށުންތޯ ނިންމާ ދުވަސް ކަމުގައެވެ. 

މި ވާހަކައާއި ވިދިގެން މުއިއްޒު ވިދާޅުވީ، އެ ބޭފުޅާއަށް އިތުބާރު ކުރައްވާ ވެރިކަން ހަވާލުކޮށްދެއްވައިފި ނަމަ ދިވެހިގެން ތަރައްގީގެ ދުވެލީގައި ދިވެހިންގެ ރާއްޖެ ގެނެސްދޭނެ ކަމުގައިއެވެ. 

މީގެ އިތުރުން މުއިއްޒުގެ ވާހަކަފުޅުގައި މަޑަވެއްޔަށް މި ވަގުތު ބޭނުންވާ ތަރައްގީގެ މުހިއްމު ކަންކަމަށް އަލި އަޅުވާލައި ވިދާޅުވީ ޕީޕީއެމް ޕީއެންސީގެ ވެރިކަމެއްގައި އެ ރަށުގެ ބިމުގެ ޖާގައިގެ ދަތިކަން އެއްކޮށް ހައްލުކޮށްދެއްވާނެ ކަމުގައެވެ. އަދި މިހާރު އޮތް ބަނދަރު އެހެން ސަރަހައްދަކަށް ބަދަލުކޮށް ޖާގަ ތަނަވަސް ބޮޑު ބަނދަރެއް ތަރައްގީކޮށްދެއްވާނެ ކަމުގައެވެ. 

މީގެ އިތުރުން މަޑަވެއްޔަށް ކޮށްދެއްވާނެ އިތުރު ކަންކަމުގެ ތެރޭގައި މުޅި ރާއްޖެއަށްވެސް ދިމާވެފައިވާ ސިއްހީ ނިޒާމުގެ މައްސަލަ އެ ރަށުގައިވެސް ހައްލުކޮށްދެއްވާނެކަމަށާއި ރަށު ސްކޫލު އެއްދަންފަޅިއަށް ބަދަލު ކުރުމަށް ބޭނުންވާ އިންފްރާސްޓްރަކްޗާ ގާއިމްކޮށްދެއްވާނެކަމަށް މުއިއްޒުވަނީ ވައުދުވެވަޑައިގެންފައެވެ. 

ގދ އަތޮޅަށް ކުރައްވަމުންގެންދަވާ ކެމްޕެއިންގައި ޑރ މުއިއްޒުއާއީ ކެމްޕެއިން ޓީމަށް އެ އަތޮޅުގެ ރަށްތަކުގެ ގިނަ އަދަދެއްގެ ރައްޔިތުންތަކެއްދާނީ ނިކުމެ މަރުހަބާ ކިޔަމުންނެވެ.