ރާއްޖޭގައި ޑޮލަރު ދައުރުވާ މިންވަރު އިތުރުކޮށް ޑޮލަރު ލިމިޓް އުވާލާނެ ކަމަށް ޕީއެންސީ ޕީޕީއެމްގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ ރޭ ގދ ތިނަދޫގައި ބޭއްވުނު ޖަލްސާގައި ވާހަކަފުޅުދައްކަވަމުންނެވެ.

ޑރ މުޢިއްޒު ވިދާޅުވީ ކާޑުގައި ޑޮލަރު ލިމިޓެއް ކަނޑައަޅާފައި އޮތުމަކީ އެތައް ބަޔަކަށް ގިނަ ދަތިތަކެއް ކުރިމަތިވާ ކަމެއް ކަމަށާއި އެހެންކަމުން އެ ލިމިޓް އޭނާގެ ވެރިކަމެއްގައި އުވާލާނެ ކަމަށެވެ.

Advertisement

ނަމަވެސް، އެކަން ކުރާނީ މަރުހަލާތަކެއްގެ ތެރެއިން ކަމަށާއި ފުރަތަމަ ތިން މަހު ލިމިޓް ޑަބަލްކުރުމަށް ފަހު، ދެން އެއްކޮށް ލިމިޓް އުވާލާނީ ކަމަށް ވިދާޅުވި އެވެ. މުޢިއްޒު އިތުރަށް ވިދާޅުވީ އެކަން ކުރާނީ ރާއްޖޭގައި ޑޮލަރު ދައުރުވާ މިންވަރު އިތުރުކޮށްގެން ކަމަށެވެ.

މީގެ އިތުރުން ރޭ ތިނަދޫގައި ބޭއްވި ޖަލްސާގައި ޑރ މުޢިއްޒު ވަނީ 55 އަހަރާއި 66 އަހަރާއި ދެމެދުގެ މީހުންގެ ތެރެއިން އަމިއްލައަށް ރިޓަޔަރ ވާމީހުންނަށް ހާއްސަ އެލެވެންސްއެއް ތަރަފްކުރައްވާނެ ކަމަށް ވިދާޅުވެފައެވެ.

އެގޮތުން މުޢިއްޒު ވިދާޅުވީ އުމުރުން 55 އަހަރުވުމުން އަމިއްލަ އަށް ރިޓަޔާކުރުމުގެ ފުރުސަތު އޮތް ނަމަވެސް، ޕެންޝަން ލިބެނީ 65 އަހަރުވުމުންނެވެ. އެއީ، އެންމެ ރަނގަޅު ގޮތް ނޫން ކަމަށާއި 55 އަހަރުވުމުން ރިޓަޔާ ކުރާ މީހުންނަށް ވެސް ގޮތެއް އޮންނަން ޖެހޭނެ ކަމަށް މުޢިއްޒު ވިދާޅުވި އެވެ.

މީގެ އިތުރުން ޝަރުޢީ ދާއިރާއާ ގުޅޭ ގޮތުން ވެސް ޑރ މުޢިއްޒު ވަނީ ވަޢުދުތަކެއް ވެވަޑައިގެންފަ އެވެ. އެންމެ މުހިންމު ކަމެއް ކަމަށް ފާހަގަކުރެއްވީ ޖުޑީޝަލް ސާވިސް ކޮމިޝަން (ޖޭއެސްސީ)އިން ސިޔާސީ މީހުން މަދުކޮށް ޝަރުޢީ ދާއިރާގެ މީހުން ގިނަކުރުމެވެ. އަދި، ކޯޓުތަކުގެ އިދާރީ ކަންކަމުގެ ބާރުވެރިކަން އެ ކޮމިޝަނުން ނަގައި ހާއްސަ ޑިޕާޓްމެންޓާ ހަވާލުކުރުމެވެ.

މީގެއިތުރުން ފަނޑިޔާރުންނަށް ހާއްސަކޮށް ބޯހިޔާވަހިކަމުގެ މަޝްރޫއެއް ހިންގަން ވެސް މުޢިއްޒު ވައުދުވެވަޑައިގަތެވެ.