ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވެރިކަމެއްގައި ސިނަމާލެ ބްރިޖުގެ ބޭނުންކުރާ މީހުން އަތުން ފީއެއް ނަގާނެ ކަމަށް ބުނެ ދައްކަނީ ކަނޑައެޅިގެން ދޮގު ވާހަކަތަކެއް ކަމަށް، އެމަނިކުފާނު ވިދާޅުވެއްޖެއެވެ. 

މުޢިއްޒު މިއަދު ކުރެއްވި ޓްވީޓެއްގައި، އިދިކޮޅުގެ ވެރިކަމެއްގައި ސިނަމާލެ ބްރިޖު ބޭނުންކުރާ ރައްޔިތުން އަތުން ފީ ނަގަން ނިންމާފައިވާ ކަމަށް ދެކެވޭ ވާހަކަތައް ދޮގު ކުރައްވައި އެމަނިކުފާނު ވަނީ، އެފަދައިން ދޮގު ބުހުތާނު ވާހަކަތައް ފެތުރުމަކީ ޒިންމާދާރުކަން ކުޑަ، ނާތަހުޒީބު ޢަމަލެއްގެ ގޮތުގައި ސިފަ ކުރައްވާފައެވެ. 

މުޢިއްޒު މިފަދައިން ވިދާޅުވެފައި ވާއިރު، ކުރިއަށް އޮތް ރިޔާސީ އިންތިހާބު އިދިކޮޅަށް ކާމިޔާބުވެއްޖެނަމަ، ބްރިޖުން ދަތުރުކުރާ މީހުންގެ އަތުން 20ރ ގެ ފީއެއް ނަގާނެކަމަށް ބުނެ ސޯޝަލް މީޑިއާގައި ވެރިކަން ކުރާ އެމްޑީޕީއަށް ތާއީދުކުރާ ބައެއް ފަރާތްތަކުން ދަނީ ވާހަކަތަކެއް ފަތުރަމުންނެވެ.

މުޢިއްޒުގެ ހައުސިންގް މިނިސްޓަރު ކަމުގައި އެޅިގެން ދިޔަ އެ ބުރިޖަކީ، ރާއްޖޭގެ ތަރައްގީގެ ބޮޑު ހިއްސާއަކަށް ވެފައިވާއިރު، އޭގެ ސަބަބުން ދަތުރުފަތުރު ކުރުމަށް ބޮޑު ލުއެއް ލިބިވެން ވަނީ ގޮއްސައެވެ. އެއީ ޗައިނާގެ އެހީތެރި ކަމާއި އެކު އަޅައި ނިންމި ބްރިޖެކެވެ.