އާޓިފިޝަލް އިންޓަލިޖެންސް (އޭއައި) ޓެކްނޮލޮޖީ ސުކޫލުތަކަށް ތައާރަފުކޮށް ޒަމާނީ ޓެކްނޮލޮޖީގެ ވަސީލަތްތައް ބޭނުންކޮށްގެން ދަރިވަރުންނަށް ކިޔަވައިދިނުމުގެ ނިޒާމަށް ތައުލީމީ ދާއިރާ އަޕްގްރޭޑްކުރައްވާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވައުދުވެވަޑައިގެންފި އެވެ. 

އެމަނިކުފާނު މިފަދައިން ވިދާޅުވެފައި ވަނީ ޅ ނައިފަރުގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އެގޮތުން ޑރ މުއިއްޒު ވިދާޅުވީ ބަވަނަވަމުންދާ ދުނިޔޭގެ އާޖުފާޖަށް ލޯހުޅުވިފައިވާ ދަރިންތަކެއް ބިނާކުރުމަށް ޒަމާނީ ޓެކްނޮލޮޖީގެ ވަސީލަތްތައް ބޭނުންކޮށްގެން ދިވެހި ދަރިވަރުންނަށް ކިޔަވައިދިނުމަކީ މުހިންމު ކަމެއްކަމަށް ދެކިވަޑައިގަންނަވާ ކަމަށެވެ. 

އެގޮތުން އެމަނިކުފާނަށް ވެރިކަން ލިބިވަޑައިގެންފި ނަމަ ދުނިޔޭގައި ކުރިއަރަމުން އަންނަ އާޓިފިޝަލް އިންޓެލިޖެން ޓެކްނޮލޮޖީ (އޭއައި ޓެކްނޮލޮޖީ) ގެ ވަސީލަތްތައް ސުކޫލުތަކަށް ތައާރަފުކޮށް، އެ ޓެކްނޮލޮޖީގެ އެހީގައި ދަރިވަރުންނަށް ކިޔަވައިދިނުމަށް މުޅި ނިޒާމު އަޕްގްރޭޑް ކުރައްވާނެކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ އެމަނިކުފާނު ރައްޔިތުންނަށް ވައުދުވެލައްވަނީ އެކަން ކުރައްވާނެ ފަންނުވެރިކަން ރަނގަޅަށް ބައްލަވާ ހޯއްދެވުމަށް ފަހުގައި ކަމަށެވެ.

ފަހަރެއްގައި ވެސް ވެރިކަމަށް ކުރިމަތިލައްވައިގެން އުޅުއްވަނީ ސަކަރާތް ޖެހުމަށް ނޫން ކަމަށާއި، ރައީސް ޔާމިނުގެ އިރުޝާދާއި އެކު، އެމަނިކުފާނުގެ ފަހަތްޕުޅުގައި އޮތް ޓީމާއެކު ރިޔާސީ އިންތިޚާބުގައި ރައްޔިތުންނަށް ވެލައްވާ ވައުދުތައް ފުއްދާދެވޭނެ ކަމުގެ ފުރިހަމަ ޔަގީންކަން އޮތްކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ ތައުލީމީ ނިޒާމު ހަރުދަނާކޮށް، އީޖާދީ ތަރައްގީގެ ކުރިއެރުން ގައުމަށް ހޯދުމަށް ނެޝަނަލް ރިސާޗް ފަންޑެއް ހުޅުވާ، ދިރާސާ ކުރުމުގެ ފުރުސަތު ފަންނީ ބޭފުޅުންނަށް ދެއްވާނެ ކަމަށެވެ. އަދި ދިރާސާކޮށްގެން ގައުމުގެ ކަންކަން ކުރިއެރުވުމަށް މަސައްކަތް ކުރުމަށް، ތައުލީމީ، ފަންނީ މީހުންގެ ބޭނުން ސަރުކާރުން ހިފާނެ ކަމަށެވެ.