މި އަހަރުގެ ރިޔާސީ އިންތިޚާބުގެ ވޯޓު އޮޅުވާލުމުގެ ފުރުސަތު ނުލިބޭނެހެން ވަރަށް ބޮޑަށް ފާރަވެރިވުމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމު ގޮވާލައްވައިފި އެވެ. 

ނައިފަރުގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ޝިޔާމު ވިދާޅުވީ ރިޔާސީ އިންތިޚާބު އެއްބުރުން ޑރ މުއިއްޒު ކާމިޔާބު ކުރައްވާތަން ފެނިވަޑައިގަންނަވާ ކަމަށެވެ. 

އެހެންކަމުން މި އިންތިޚާބު އޮޅުވާލުމަށް ސަރުކާރުން މަސައްކަތް ކުރާނެ ކަމަށާއި، އެހެން ނަމަވެސް އެ ފުރުސަތު ނުދެއްވާ ރައްޔިތުން ވަރަށް ބޮޑަށް މި އިންތިޚާބުގެ ވޯޓު ނަގާއިރު ފާރަވެރިވެ ބަލަމުން ގެންދިއުމަށް އެދިވަޑައިގަންނަވާ ކަމަށް ޝިޔާމު ވިދާޅުވި އެވެ. 

Advertisement

ނައިފަރު ޖަލްސާގައި ޝިޔާމު ވާހަކަދައްކަވަނީ

ޝިޔާމު މިފަދައިން ވިދާޅުވެފައި ވާއިރު، ޑރ މުއިއްޒުގެ ތަރުޖަމާނު ބޭއްވި ޕްރެސް ކޮންފަރެންސްގައި ވަނީ ރިޔާސީ އިންތިޚާބުގެ ވޯޓުލާ ދުވަހު ޤައުމުގައި ހަމަނުޖެހުން އުފައްދާ ޤައުމު ހަލަބޮލިކުރުމަށް އެމްޑީޕީގެ އިސްވެރިން ރާވަމުން ގެންދާކަމުގެ މައުލޫމާތު ލިބިފައިވާކަން ހާމަކޮށްފަ އެވެ. އަދި އެފަދައިން ރޭވުންތައް ރާވަމުންދަނީ އެމްޑީޕީގެ އިސްވެރިންކަން ޠަލާލު ފާހަގަކުރެއްވި އެވެ. 

އޭގެ އިތުރުން ޠަލާލު ވިދާޅުވީ ރިޔާސީ އިންތިޚާބަށް ނުފޫޒު ފޯރުވުމަށް ވެސް ސަރުކާރުން ވަރަށް ގިނަ ކަންތައްތަކެއް ކުރަމުންދާ ކަމަށެވެ. އެގޮތުން އިންތިޚާބާއި ދިމާކޮށް ވަޒީފާތައް އުފެއްދުމާއި، ވަޒީފާތަކުގައި ތިބި މީހުންނަށް ބިރުދެއްކުމާއި، ލާރި ބެހުމާއި މަޝްރޫއުތައް އިފްތިތާހުކުރުން ފަދަ ގިނަ ކަންތައްތަކެއް ކުރަމުންދާކަން ޠަލާލު ފާހަގަކުރެއްވި އެވެ. 

އެއާއެކު ޕްރޮގްރެސިވް ކޮންގްރެސް ކޯލިޝަނުން ވަނީ މިނިވަން އިންތިޚާބެއް ބޭއްވުމަށް ހުރަސްއެޅޭ ކަންތައްތަކެއް ފާހަގަކުރެވިފައިވާތީ، އިލެކްޝަންސް ކޮމިޝަންގެ އަމިއްލަ އިސްނެގުމުގެ ދަށުން އެ މައްސަލަތައް ބަލައި ފިޔަވަޅު އަޅުއްވާދިނުމަށް އެދިވަޑައިގެންފަ އެވެ.