ފ ބިލެތްދޫ ސްކޫލް ކްލާސްރޫމް ތަކުގައި ކިޔެވުމަށް ބޭނުންކުރާ މޭޒުތައް ހަލާކުވެ ވީރާނަވެގޮސް ބޭނުން ނުކުރެވޭ ހާލާތައް ގޮސްފައިވާއިރުވެސް އެޑިއުކޭޝަން މިނިސްޓްރީން ސްކޫލަށް މޭޒު ފޯރުކޮށް ނުދޭ މައްސަލައެއް ފެންމަތިވެެއްޖެއެވެ. 

ވޮއިސް އެމްވީއަށް މައުލޫމާތު ދެމުން ބިލެތްދޫ ސްކޫލުގެ ބެލެނިވެރިއަކު ބުނެފައިވަނީ އެޑިއުކޭޝަން މިނިސްޓްރީން އެރަށުގެ ސްކޫލަށް އެއްވެސް ވަރަަކަށް މޭޒު ފޯރުކޮށް ނުދޭތާ މިހާރު ގާތްގަނޑަކަށް 10 ވަރަކަށް އަހަރު ވެދާނެކަމަށެވެ. 

މީގެ އިތުރުން އެ ސްކޫލުގެ މޭޒުތައް ހަލާކުވެ ބޭނުންނުކުރެވޭ ވަރުވުމުން ކޮންމެ ދިރާސީ އައު އަހަރެއްގެވެސް ގްރޭޑް 2ށް ބަދަލުވާ ކްލާހުގެ ބެލެނިވެރިން އެ ސްކޫލުން ހޮވާލެވޭ އެންމެ ބާ މޭޒުތައް މަރާމާތުކޮށް އެ ކްލާސްތަކުގައި ބޭނުންކުރާ ކަމުގައި އެނާ ބުންޏެވެ. އަދި އެރަށު ސްކޫލުގެ ބެލެނިވެރިން މިކަން މިގޮތަށް ކުރަމުން އަންނަތާ 5 ވަރަކަށް އަހަރު ވެދާނެކަމުގައިވެސް އޭނާ ބުނެއެވެ.

މީގެ އިތުރުން މި ބެލެނިވެރިޔާ ބުނީ ބިލެތްދޫ ސްކޫލުގެ މެނޭޖްމެންޓުން 60 މޭޒު އެރަށު ސްކޫލަށް ހޯދުމަށް އެޑިއުކޭޝަން މިނިސްޓްރީގައި އެދެމުން އަންނަތާ 2 އަހަރު ވެއްޖެ ކަމަށާއި، ކޮންމެ ދިރާސީ އަހަރެއް ފެށެންވާއިރަށް މޭޒު ފޯރުކޮށްދޭނެ ކަމަށް އެޑިއުކޭޝަން މިނިސްޓްރީން ބުނި ނަމަވެސް އަދި އަދަށްވެސް އެ ސްކޫލަށް އެއްވެސް މޭޒެއް ލިބިފައި ނުވާކަން އޭނާ ފާހަގަކުރެއެވެ.

ފ ބިލެތްދޫ ސްކޫލްގެ މޭޒުތަކުގެ ހާލަތު 

މީގެ އިތުރުން މި ފެށުނު ދިރާސީ އައު އަހަރުގެ ކިޔެވުން ފެށެންވެގެންވެސް އެ ރަށު ސްކޫލުގެ ބެލެނިވެރިންނާއި ބައްދަލުކޮށް މޭޒުތައް މަރާމާތުކުރުމުގެ ވާހަކަދެކެވުނު ކަމަށާއި އެހެންނަމަވެސް މިއަހަރު ބެލެނިވެރިން އެކަމާ ދެކޮޅު ހަދާފައިވާ ކަމަށް އެ ބެލެނިވެރިޔާ މައުލޫމާތު ދިނެވެ. 

މީގެ އިތުރުން އެ ބެލެނިވެރިޔާ ފާހަގަ ކުރި ގޮތުގައި ކޮންމެ ދިރާސީ އަހަރަކަށްވެސް އައު މޭޒު ހޯދުމަށް ބިލެތްދޫ ސްކޫލުގެ މެނޭޖްމެންޓުން ބޮޑެތި މަސައްކަތްތަކެއް ކުރި ނަމަވެސް އެޑިއުކޭޝަން މިނިސްޓްރީން އެކަމަށް އެއްވެސް އެދެވޭ ސަމާލުކަމެއް ދީފައިނުވާ ކަމަށެވެ. 

މީގެ އިތުރުންވެސް މޭޒުތައް ގިނަ ދުވަސްވެ ކުރީ އަހަރުތަކުގައި އެ މޭޒުތަަކުގައި ލިޔެފައި ހުންނަ ހަޑިހުތުރު ބަސްތައް ހުންނަކަމަށާއި މިއަހަރުގެ ކިޔެވުން ފެށުމުގެ ގޮތުން ސްކޫލުގެ ފަރާތުން އެ މޭޒުތަަކުގައި ބްރިސަލް ބޯޑު އަޅައި އެ ތަކެތި ފޮރުވި ނަމަވެސް މިހާރު ކަރުދާސްތައް ވީދި އެ އެއްޗިހި ކުދިންނަށް ފެންނަން ހުންނަ ކަމުގައެވެ. 

ފ އަތޮޅުގެ ނިސްބަތުން ބިލެތްދޫ ސްކޫލަކީވެސް ތައުލީމީ ގޮތުން ފާހަގަކޮށްލޭ ސްކޫލަކަށް ވާއިރު، މިފަދަ ދަރިވަރުންގެ ތައުލީމާއި ގުޅުންހުރި މުހިއްމު ކަންކަމުގައި ސްކޫލުތަކުގެ ބެލެނިވެރި ފަރާތްކަމުގައިވާ މިނިސްޓްރީ އޮފް އެޑިޔުކޭޝަނުން ފަރުވާކުޑަ ކުރަމުން އަންނަ ކަމުގައި ވަނީ ނަމަ އެކަމުގެ ނޭދެނޭ އަސަރު ދަރިވަރުންގެ ތައުލީމަށް ކުރާނެކަން ޔަގީނެވެ.