2012 ވަނަ އަހަރުގެ ފެބްރުއަރީމަހުގެ 7 ވަނަ ދުވަހު އޭރު ވެރިކަމުގައި ހުންނެވި ރައީސް ނަޝީދުގެ ވެރިކަން ބަދަލުވި ގޮތް ތަހުގީގު ކުރަން އެކުލަވާލި ކޮމިޝަން އޮފް ނެޝަނަލް އިންކުއަރީ (ކޯނީ)ގެ ރިޕޯޓް މިހާރު ވީތަނެއް ނޭނގޭ ކަމަށާއި އެ ރިޕޯޓަށް ވީގޮތް ބެލުމަށް އެ މައްސަލަ ފުލުހަށް ހުށަހަޅާފައިވާ ކަމުގައި ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިންގައި އަތޮޅު ތެރޭގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ ނޭކުރެންދޫއަށް ވަޑައިގެން ރައީސް ދެއްކެވި ވާހަކަފުޅުގައި ކުރީ ސަރުކާރުތަކުން ކަންކަން ކުރެއްވި ގޮތްތަކަށް އަލި އަޅުއްވައި ދެއްކެވި ވާހަކަފުޅުގައި ރައީސް ވިދާޅުވީ ކޯނީގެ ރިޕޯޓްވެސް މިހާރު ގެއްލިފައިވާ ކަމަށެވެ. 

އަދި އެ ރިޕޯޓަކީ ތަހުގީގަށްފަހު 25 އަހަރު ވަންދެން ރައްކާކޮށްފައި ބޭއްވުމަށް ހަމަޖެހިފައި އޮތް ރިޕޯޓެއް ކަމުގައިވެސް ރައީސް ވިދާޅުވިއެވެ. 

Advertisement

ކޯނީ ރިޕޯޓް ގެއްލުމަށް އަލިއަޅުވާލައްވައި ރައީސް ވިދާޅުވީ އެކަމަކި ރިޔާސީ އިންތިހާބުގައި ވާދަކުރައްވާ އެހެން ކެންޑިޑޭޓުންނާއި މެދު ވިސްނަން ޖެހޭ ކަމެއް ކަމަށެވެ. 

އިންކުއަރީ ކޮމިޝަން އެކުލަވާލީ ފެބްރުއަރީ 7 ގައި ވެރިކަން ބަދަލުވާން ހިނގާފައިވާ ގޮތް، މިނިވަންކަމާއި އިންސާފުވެރިކަމާއެކު ބަލައި ހޯދައި، އެކަމުގެ ރިޕޯޓެއް އެކުލަވައިލުމަށެވެ. އެ ވެރިކަން ނިމުނީ އެ ރިޕޯޓުގައިވާ ގޮތުން ގާނޫނުއަސާސީ އާއި ގާނޫނާ އެއްގޮތްވާ ގޮތުގެ މަތިންނެވެ.މި ރިޕޯޓާ ގުޅިގެން، އޭރުގެ ރައީސް ޑރ. މުހައްމަދު ވަހީދު އޮގަސްޓް، 30، 2012 ގައި ބޭއްވެވި ނިއުސް ކޮންފަރެންސެއްގައި ވެސް ވިދާޅުވީ ކުރީގެ ރައީސް މުހައްމަދު ނަޝީދުގެ އެ ވެރިކަން ނިމުނީ، އެ އެމްޑީޕީން ތުހުމަތު ކުރި ގޮތަށް ބަޣާވާތަކުން ނޫން ކަމަށާއި ގާނޫނީ ގޮތުން ސައްހަކޮށް ކަަމަށެވެ.