ރާއްޖޭގެ މިނިވަންކަމަށް ހުރަސް އެޅޭ ގޮތަށް އެއްވެސް މަޝްރޫއެއް އިންޑިއާގެ ކުންފުންޏަކާ ހަވާލުކޮށްފައިވާ ނަމަ އެ ކުންފުންޏެއް ރާއްޖެ އިން ބޭރުކުރަން ފަސްޖެހިވަޑައިނުގަންނަވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
ޑރ. މުއިއްޒު މިފަދައިން ވިދާޅުވީ ރިޔާސީ އިންތިހާބުގެ ކެމްޕެއިނަށް އަތޮޅު ތެރެއަށް ކުރައްވާ ދަތުރުފުޅުގެ ތެރެއިން އދ. މަހިބަދޫއަށް ވަޑައިގެން ސަޕޯޓަރުންނާ ބައްދަލުކުރައްވަން ބޭއްވި ޖަލްސާގައެވެ.
މުއިއްޒު ވިދާޅުވީ އިންތިހާބު ގުޅިފައި އޮތީ ހަމައެކަނި ތަރައްގީއާ ނޫން ކަމަށާއި އެންމެ ބޮޑު ކަމަކަށް އޮތީ މިނިވަންކަން ޔަގީން ކުރުން ކަމަށެވެ.
އަދި ދިވެހީންގެ މިނިވަންކަމަކީ އޭނާގެ ވެރިކަމެއްގައި "ނަންބަރު ވަން" ކަމަށާއި މިނިވަންކަމާމެދު ސުވާލު ކުރޭވޭކަށް ނޯންނާނެކަމަށެވެ. އަދި މިނިވަންކަމަށް ހުރަސް އެޅޭނަމަ މި ގައުމުގައި ތިބެވިގެން ނުވާނެކަމަށާއި އެހެން ގައުމެއްގެ ސިފައިން މި ގައުމުގައި ތިބުމަކީ ދޭނެ ފުރުސަތެއް ނޫންކަމަށްވެސް އޭނާ ވިދާޅުވިއެވެ.
"މިނިވަންކަން [އެއީ] ނަންބަރު ވަން. މިނިވަންކަމަކާ ނޯންނާނެ ސުވާލު ކުރޭވޭކަށް. މިތާ ތިބެވިގެން ނުވާނެ. އަޅުގަނޑު އެއްބަހެއް ވެސް ނުވާނަން އެހެން ގައުމެއްގެ ސިފައިން ތިބޭކަށް. އަޅުގަނޑުމެންގެ މިނިވަންކަން އެއީ ހަމަ ނަންބަރު ވަން،" މުއިއްޒު ވިދާޅުވި އެވެ.
މިއާއެކު ޑރ. މުއިއްޒުގެ ވަނީ ހަނިމާދޫ އެއާޕޯޓު ތަރައްގީ ކުރަމުންދާ ގޮތާއި، އެނޫންވެސް ބައެއް މަޝްރޫތަކަަށް ބެލުމުން މިހާރު ފެންނަނީ ކަންބޮޑުވާން ޖެހޭ ފަދަ ހާލަތެއް ކަމަށާއި އެ ކަންކަން ހަމަ މަގަށް އެޅުވޭނީ ކުރީގެ ރައީސް ޔާމީންގެ ސިޔާސަތުތަކުން ކަމަށް ވިދާޅުވެފައެވެ.
އެގޮތުން އޭނާގެ ވެރިކަމެއްގައި އުތުރު ތިލަފަޅު ފަދަ ހުރިހާ އެއްބަސްވުންތައް ގައުމުގެ މަސްލަހަތު އިސްކޮށްގެން ބަލާނެ ކަމަށާއި އިހުތިޔާރު ކުރާނީ ގައުމަށް އެންމެ ރަނގަޅު ގޮތް ކަމަށް ވިދާޅުވި އެވެ.
"... ބަލާއިރު ރައްޔިތުންނަށް ފައިދާވާ ގޮތަށް އޮތް މަޝްރޫއެއް ކަމަށް ވަންޏާ ކުރިއަށް ދާނެ. މިހާރަށް ވުރެ ބާރަށް ކުރިއަށް ދާނެ. މިސާލަކަށް ބްރިޖު މަޝްރޫއު. އޭގެ ހަގީގަތެއް ނޭނގޭ. ގައިމު ވެސް ނުބައިތަކެއް ހުރީމާ ނޫންތޯ ފަސް އަހަރު ވާއިރު އެންމެ ތަނބެއް ވެސް ނުފެނިގެން މި އުޅެނީ،" މުޢިއްޒު ވިދާޅުވިއެވެ.
"އުތުރުތިލަފަޅުގެ މަޝްރޫއުގެ އަޑިއެއް ނޭނގޭ. އެއީ ގައުމުގެ މިނިވަންކަމަށް ހުރަސް އެޅޭ ކަމެއް ކަމަށް ވަންޏާ ހަމަ ޖީއާމްއެރު ބޭރުކުރި ގޮތަށް އެ މަޝްރޫއުތައް ބާތިލް ކުރާނަން."
ޑރ. މުހައްމަދު މުޢިއްޒު
ޑރ. މުއިއްޒު ވިދާޅުވީ މިކަންކަމަށް އެއްބަސްވެވޭ ގައުމުތަކާ އެކު އޭނާގެ ސަރުކާރެއްގައި ގާތް ގުޅުމެއް ބާއްވަވާނެކަމަށާއި އެހެން ނަމަވެސް ރަހުމަތްތެރިކަމާއި އަވައްޓެރިކަން އޮތް ނަމަވެސް އިސްކުރާނީ ގައުމު ކަމަށެވެ.
Advertisement
This content is created and paid for by advertisers and does not involve Voice Journalists
