މިއަދު ހެނދުނު މާލޭގައި ހިނގި އަލިފާނުގެ ހާދިސާ އާއި ގުޅިގެން ދެ މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ. 

ފުލުހުންގެ މީޑިއާ އޮފިޝަލް ވޮއިސް އަށް މައުލޫމާތު ދެއްވަމުން ވިދާޅުވީ، މިއަދު ހެނދުނު ގާތްގަނޑަށް 11:12 ކަންހާއިރު، މާލެގެ މާފަންނުގައި ހުންނަ ހައުސް ޕްލާޒާ ނަމަކަށް ކިޔާ އިމާރާތެއްގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ ރިޕޯޓް އެ އިދާރާއަށް ލިބިފައިވާ ކަމަށެވެ. 

މ. ހައުސް ޕްލާޒާ ގައި ހިނގި އަލިފާނުގެ ހާދިސާ-- ފޮޓޯ/ ވޮއިސް 

މިހާދިސާގައި އެއްވެސް މީހަކަށް އަނިޔާ ނުވާކަމަށް ފުލުހުންނާއި ސިފައިން މައުލޫމާތު ދޭއިރު، އެއީ މީހުން ނޫޅޭ ތަނެއް ކަމަށާ، ރޯވެފައި ވަނީ އެތަނުގައި ހުރި ކުނި ތަކެއްގައި ކަމަށް ސިފައިން ވަނީ ބުނެފަ އެވެ. އަދި އަލިފާންގަނޑު ކޮންޓްރޯލް ކުރެވިފައިވާ ކަމަށް ވެސް ބުނެފައިވެއެވެ.

މ. ހައުސް ޕްލާޒާ ގައި ހިނގި އަލިފާނުގެ ހާދިސާ-- ފޮޓޯ/ ވޮއިސް 

ފުލުހުންގެ މީޑިއާ އޮފިޝަލް އިތުރަށް ވިދާޅުވީ، މިހާދިސާ އާއި ގުޅިގެން ދިވެހި ދެ ފިރިހެނުން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. 

އަދި ފުލުހުން މި މައްސަލަ ތަހުގީގު ކުރަމުންދާ ކަމަށްވެސް އޮފިޝަލް ވިދާޅުވި އެވެ.