ސަސްޕެންޑްކުރިތާ މަދު ވަގުތުކޮޅެއްގެ ތެރޭގައި ހަސަން ކުރުސީ އެނބުރި ޓްވިޓާއަށް އަތުވެއްޖެ އެވެ.

ހަސަން ކުރުސީ އެކައުންޓަކީ ތަކުރާރުކޮށް ސަރުކާރުގެ ޖަރީމާތައް ފަޅާއަރުވާލައި ސަރުކާރުގެ ކޮރަޕްޝަންތަކާ ދެކޮޅަށް އަޑު އުފުލަމުން އައި އެކައުންޓެކެވެ.

އެ އެކައުންޓުގެ މައްސަލަ ބެލުމަށް ފުލުހުންނަށް ވެސް ހުށަހަޅާފައި ވަނިކޮށް މިއަދު ހެނދުނު ވަނީ އެކައުންޓް ސަސްފެންޑްކޮށްފައެވެ. 

ހަސަން ކުރުސީގެ ޓްވިޓާ އެކައުންޓް ސަސްޕެންޑްކުރި ސަބަބެއްގެ ގޮތުގައި ޓްވިޓާއިން ފާހަގަކުރީ ޓްވިޓާގެ އުސޫލުތަކާއި ހިލާފުވެފައިވުމެވެ. އެކައުންޓް ސަސްފެންޑްކުރުމުން އެކަން ރިވިއުކުރުމަށް "ހަސަން ކުރުސީ" ޓްވިޓާގައި އެދުމުން އެކަން ބެލުމަށްފަހު، ސަސްޕެންޑް ކުރިތާ މާ ގިނަ އިރެއް ނުވަނީސް މިހާރު ވަނީ އެ އެކައުންޓު އަލުން 'ރިސްޓޯރ' ކޮށްފައެވެ. 

އެނބުރި ޓްވިޓާއަށް އައިސް، ޓުވިޓާގެ ވެރިފަރާތް، އެލޮން މަސްކު އަށް ޝުކުރު އަދާ ކުރުމަށްފަހު ހަސަން ކުރުސީ ބުނީ "ފުލް ޕާމަނަންޓް ބޭން" އަކުން "ފުލް ރެސްޓޮރޭޝަން" އަކަށް އައިސްފައިވާ ކަމަށެވެ.

މީގެ އިތުރުން ހަސަން ކުރުސީ ވަނީ މީގެ ކުރިން އެކި ފަހަރު އެކައުންޓް ވަގުތުކޮޅަކަށް ބޭނުންނުކުރެވޭ ގޮތް ހެދިކަމަށާ، ނަމަވެސް މިއީ ދާއިމީކޮށް ފިޔަވަޅެއް އެޅި ފުރަތަމަ ފަހަރު ކަމަށް ބުނެފައެވެ. 

އެކައުންޓްގެ ސަސްޕެންޝަން އުވާލައި ޓްވިޓާއިން ބުނީ ޓްވިޓާއަށް ގޯހެއް ހެދިއްޖެ ކަމަށާއި ކުރުސީގެ އެކައުންޓުން ޓްވިޓާގެ އުސޫލުތަކާ ހިލާފުވާ ކަމެއް ކޮށްފައިނުވާ ކަމަށް ކަނޑައަޅާ ކަމަށެވެ. އަދި އެކައުންޓް ސަސްޕެންޑް ކުރެވުމުން ޓުވިޓާއިން ވަނީ އެކަމަށް މައާފަށްވެސް އެދިފަ އެވެ.

ހަސަން ކުރުސީ އެކައުންޓުން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވަރަށް ބޮޑަށް ތާއީދުކޮށް ވާހަކަދައްކާތީ ގިނަ ބަޔަކު ފުރަތަމަ ތުހުމަތުކުރި ގޮތުގައި އެ އެކައުންޓު ހިންގީ އެމަނިކުފާނެވެ. އެކަމަކު ރައީސް ނަޝީދު ވަނީ ތަކުރާރުކޮށް އެެ ތުހުމަތުތައް ދޮގުކޮށްފަ އެވެ.