އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މަދުރަސަތުލް ޢަރަބިއްޔަތިލް އިސްލާމިއްޔާގެ ބެލެނިވެރިންނާއި ބައްދަލުކުރައްވައި އުއްމީދީ ވައުދުތަކެއް ވެފައިވާ ކަމުގައި އެ ސްކޫލުގެ ބައެއް ބެލެނިވެރިން ބުނެފިއެވެ.

އަރަބިއްޔާ ސްކޫލުގެ ހައްގުގައި އަޑު އުފުލުމަށް ޓަކައި ހަދާފައިވާ "އަރަބިއްޔާ ފެމެލީ" ޓްވިޓާ އެކައުންޓުން ކޮށްފައިވާ ޓްވީޓެއްގައި އެބެލެނިވެރިން ބުނެފައިވަނީ ޑރ. މުއިއްޒު އެބޭފުޅުންނާއި އެކު ބޭއްވި ކުއްލި ސަޕްރައިޒް ބައްދަލުވުމެއް ބާއްވައި ވެވަޑައިގެން ވައުދުތަކުގެ ތަފްސީލު މިއަދު ހާމަކުރާނެ ކަމަށެވެ.

އަރަބިއްޔާ ސްކޫލާއި މެދު ސަރުކާރުން އިހުމާލުވެފައިވާކަމަށާއި އަރަބިއްޔާ ސްކޫލަށް ސަރުކާރުން ދިނީ ދޯކާ ކަމުގައި ވިދާޅުވެ މުއިއްޒު ވަނީ، ވެރިކަން ލިބިއްޖެ ނަމަ އެ ސްކޫލު މާލޭގެ ރަނގަޅު ބިމެއްގައި އަޅުއްވާނެކަމަށް، މިހާރު ކުރިއަށްދާ ކެމްޕެއިންގައި މީގެ ކުރިން ވެސް ވިދާޅުވެފައެވެ.

ޢަރަބިއްޔާ ސުކޫލުގެ ކުރީގެ އިމާރާތުގައި ރެނދުއަޅައި އިމާރާތް ވަރަށް ބޮޑަށް ބާވެ، އެތަނުގައި ކިޔަވައިދިނުން ރައްކާތެރިކަމެއް ނޫންކަމަށް ފެނުމުން ދަރިވަރުން ބަދަލުކޮށްފައިވަނީ ކުރިން ފޮރިން މިނިސްޓްރީ ހިންގަމުން އައި އިމާރާތަށެވެ. އެ އިމާރާތަށް ވަގުތީ ގޮތުން ކުދިން ބަދަލުކުރުމުގެ ކުރިން ރައީސް ޞާލިޙުވަނީ ޢަރަބިއްޔާގެ އައު އިމާރާތެއް ބިނާކުރައްވަން ވައުދުވެވަޑައިގެންފައެވެ.

ޢަރަބިއްޔާގެ އައު އިމާރާތް އެޅުމަށް ސަރުކާރުން ކަނޑައަޅާފައިވަނީ މާލޭގެ އެންމެ ކާރޫބާރު ބޮޑު އެއް ސަރަހައްދުކަމަށްވެސް ޑރ މުއިއްޒު ވަނީ މީގެ ކުރިން ވިދާޅުވެފައެވެ.